Angliyaning Lankashir grafligidagi Blekpul shahrida yashovchi Neten Kammings 2020-yilda saraton, sepsis, meningit va koronavirusni yengishga muvaffaq bo‘ldi. U bu yilni “jahannam yili” deb atadi, deb yozadi Daily Star.
Qayd etilishicha, 2019-yil oktabr oyida 24 yoshli Kammingsga medulloblastoma – miyada stol tennisi to‘pi kattaligidagi xavfli o‘sma borligi aniqlandi.
Shifokorlar shoshilinch ravishda xavfli operatsiya o‘tkazishdi va o‘smaning 90 foizini olib tashlashdi.
Yigitning oilasi operatsiyadan so‘ng u bilan sodir bo‘ladigan eng yomon hodisaga ham tayyor edi. Chunki shifokorlar Neten operatsiyada vafot etishi mumkinligi, agar u operatsiyadan omon qolsa, shol bo‘lib, gapira olmasligi haqida ogohlantirgan.
Biroq sakkiz soatlik operatsiyani boshdan o‘tkazgan britaniyalik yigit ikki kun o‘tgach oyoqqa turdi. Ammo uning quvonchi uzoqqa cho‘zilmadi.
Neten 30-dekabr kuni, tug‘ilgan kunida, meningit kasalligidan vafot etishi mumkin edi. Yigit 2020-yil yanvaridan martigacha kimyoviy terapiyadan o‘tayotganda ikki marta sepsis bilan og‘rigan. 2021-yil yanvar oyida Kammings yana meningit bilan kasallanib qoldi va bir hafta o‘tgach, unga koronavirus tashxisi qo‘yildi. Ammo yigitning holati to‘rt kundan keyin yaxshilandi.
Neten nega u birdaniga ko‘plab kasalliklar bilan og‘riganini tushunmaydi. Ammo u optimist bo‘lib qoldi va hozirda boshqa odamlarni hech qachon taslim bo‘lmaslikka chaqirmoqda.
“Bu yil jahannam yili bo‘ldi. Saraton, kimyoviy terapiya, meningit, sepsis va katarakta bilan kurashish. Koronavirusdan hech qanday muammosiz omon qolganim ham g‘alati”, – dedi Neten.
Izoh (0)