Farg‘ona shahri hokimi Hamid Habibidinov boshchiligidagi “to‘rtlik” ishdan olindi, deya xabar berdi “Daryo” muxbiri.
Ma’lum bo‘lishicha, sektorlar ishini tizimli tashkil etmagani va xizmat vazifalarini bajarishda yo‘l qo‘ygan kamchiliklari uchun Farg‘ona shahrining 4 ta sektor rahbari: hokim — Hamid Habibidinov, prokuror — Atham Mamataliyev, ichki ishlar bo‘limi boshlig‘i — Shavkat Dadaxonov va davlat soliq inspeksiyasi boshlig‘i — Vohidjon Bobobekov lavozimidan ozod etilgan.
Ta’kidlanishicha, 5-fevral kuni o‘tkazilgan xalq deputatlari viloyat kengashi sessiyasidan so‘ng Shavkat Mirziyoyev kutilmaganda Farg‘ona shahridagi “Shodiyona” mahallasiga borgan. Mahalla oralab yurib, aholi bilan uchrashgan. Aholi bilan muloqot qilib, yashash tarzi bilan tanishgan, muammolarini so‘ragan. Xulosalarga ko‘ra, davlat rahbari sektor rahbarlari faoliyatidan qoniqmagan va ular lavozimidan olingan.
Eslatib o‘tamiz, avvalroq Prezident Shavkat Mirziyoyevning Farg‘ona viloyatiga tashrifi davomida Quva, Yozyovon va O‘zbekiston tumanlari hokimlari vazifasidan ozod qilingani haqida xabar berilgan edi.
Izoh (0)