Фарғона шаҳри «тўртлиги» вазифасидан озод қилинди

Фарғона шаҳри ҳокими Ҳамид Ҳабибидинов бошчилигидаги «тўртлик» ишдан олинди, дея хабар берди «Дарё» мухбири.

Маълум бўлишича, секторлар ишини тизимли ташкил этмагани ва хизмат вазифаларини бажаришда йўл қўйган камчиликлари учун Фарғона шаҳрининг 4 та сектор раҳбари: ҳоким — Ҳамид Ҳабибидинов, прокурор — Атҳам Маматалиев, ички ишлар бўлими бошлиғи — Шавкат Дадахонов ва давлат солиқ инспекцияси бошлиғи — Воҳиджон Бобобеков лавозимидан озод этилган.

Таъкидланишича, 5 февраль куни ўтказилган халқ депутатлари вилоят кенгаши сессиясидан сўнг Шавкат Мирзиёев кутилмаганда Фарғона шаҳридаги «Шодиёна» маҳалласига борган. Маҳалла оралаб юриб, аҳоли билан учрашган. Аҳоли билан мулоқот қилиб, яшаш тарзи билан танишган, муаммоларини сўраган. Хулосаларга кўра, давлат раҳбари сектор раҳбарлари фаолиятидан қониқмаган ва улар лавозимидан олинган.

Эслатиб ўтамиз, аввалроқ Президент Шавкат Мирзиёевнинг Фарғона вилоятига ташрифи давомида Қува, Ёзёвон ва Ўзбекистон туманлари ҳокимлари вазифасидан озод қилингани ҳақида хабар берилган эди.