Yunusoboddagi “Universam” ko‘prigida ta’mirlash ishlar yakunlanib, yo‘lning yopilgan qismi transportlar harakati uchun ochildi

Toshkentning Ahmad Donish ko‘chasidagi ko‘prik 2 hafta davomida ta’mirlanishi, ta’mirlash ishlarini tezroq yakunlash maqsadida ko‘prikning bir tarafi avtotransport vositalarining qatnovi uchun to‘liq yopilishi to‘g‘risida xabar berilgandi. Poytaxt hokimligining ma’lum qilishicha, ko‘prikdagi ta’mirlash ishlari hozirda yakunlangan.

“Amir Temur va Ahmad Donish ko‘chalari kesishmasidagi yo‘l o‘tkazgichdagi ta’mirlash ishlari yakunlanib, yo‘lning yopilgan qismi transport harakati uchun ochildi”, — deyiladi xabarda.

14—17-yanvar kunlari ko‘prikning 7-sonli (oldingi 17-son) Shahar klinik shifoxonasidan “Yunusobod” metro bekati (mo‘ljal: “Universam”)gacha bo‘lgan oraliqda (ikki tomonlama yo‘lning bir tomoni),  14—21-yanvar kunlari ko‘prikning ikkinchi tomoni ta’mirlanishi belgilangan edi.

Eslatib o‘tamiz, 2020-yilning dekabrida Toshkentning Taxtapul mavzesidagi “tankodrom” ko‘prikning to‘xtab qolgan ta’miri bir oyga qolmay yakunlangandi.