O‘zbekistonda endi o‘zini o‘zi band qilgan fuqarolar Soliq mobil ilovasi orqali bepul ro‘yxatdan o‘tishi va Click hamda Payme ilovalari orqali ijtimoiy soliqni ixtiyoriy to‘lashlari mumkin. Bu haqda Pensiya jamg‘armasi axborot xizmati ma’lum qildi.
“O‘zini o‘zi band qilgan fuqarolarni soddalashtirilgan tartibda ro‘yxatdan o‘tkazish to‘g‘risida”gi Prezident qaroriga muvofiq, o‘zini o‘zi band qilish mumkin bo‘lgan faoliyat turlari 23 tadan 67 taga kengaytirildi. Endilikda norasmiy sektorda band bo‘lgan fuqarolarning faoliyati legallashtiriladi. Mobil ilova (Soliq ilovasi) orqali ro‘yxatdan o‘tish bepul qilib qo‘yildi.
O‘zini o‘zi band qilgan fuqarolarni hisobga olinishi, band aholi nima ish bilan shug‘ullanayotganligining hisobi yaratiladi, ya’ni qancha fuqaro sartarosh, etikdo‘z, aravakash, tikuvchi, bozorda kunlik daromadga ega bo‘lganlarni aniqlash imkonini beradi.
Ta’kidlanishicha, O‘zbekiston fuqarolari tomonidan yiliga bazaviy hisoblash miqdorining kamida bir baravari miqdorida ixtiyoriy tartibda to‘langan hisobot davri bir yillik ish stajiga hisoblanadi.
Yuqoridagi yo‘nalishlar bo‘yicha fuqarolar tomonidan to‘lovlarni amalga oshirish istagi bo‘lsa, Click va Payme mobil ilovalar yoki joylardagi banklarning maxsus kassalari orqali to‘lovlarni amalga oshirish mumkinligi ma’lum qilingan.
Avvalroq Davlat soliq qo‘mitasi raisi o‘rinbosari O‘zbekistondagi kirakashlar nega o‘zini o‘zi band qilgan fuqarolar ro‘yxatiga kiritilmaganiga izoh bergani haqida xabar berilgandi.
Izoh (0)