Ўзбекистон Олий Мажлиси Сенати 5 февраль куни бўлиб ўтган 12-ялпи мажлисида сайлов қонунчилиги такомиллаштирилиши муносабати билан айрим қонун ҳужжатларига ўзгартиш ва қўшимчалар киритиш тўғрисидаги қонунни маъқуллади. Бу ҳақда «Gazeta.uz» хабар қилди.
Қонунчилик палатаси томонидан 29 январь куни қабул қилинган қонунни кўриб чиққан Сенатнинг Коррупцияга қарши курашиш ва суд-ҳуқуқий масалалар қўмитаси раиси Наримон Умаров қонун бўйича хулоса қилди.
Унинг сўзларига кўра, қонунда 2019 йилги парламент сайловларини ташкил этиш ва ўтказишдаги камчиликлар ҳамда Европада хавфсизлик ва ҳамкорлик ташкилотининг Демократик институтлар ва инсон ҳуқуқлари бўйича бюроси тавсиялари ҳисобга олинган.
Қонундаги бандлардан бири билан Президент, Қонунчилик палатаси, Қорақалпоғистон Жўқорғи Кенгеси, шунингдек, вилоятлар, туманлар ва шаҳарлар давлат ҳокимияти вакиллик органлари учун ўтказиладиган сайловлар санаси декабрь ойининг учинчи ўн кунлигининг биринчи якшанбасидан октябрь ойининг учинчи ўн кунлигининг биринчи якшанбасига кўчирилди (2021 йилда ушбу сана 24 октябрга тўғри келмоқда).
Бундан ташқари, Сайлов кодекси ва «Сиёсий партияларни молиялаштириш тўғрисида»ги қонунга ўзгартиришлар киритилмоқда.
Қонун кучга кириши учун уни Президент имзолаши керак.
Изоҳ (0)