Prezident Shavkat Mirziyoyev xalq deputatlari Farg‘ona viloyati kengashining 5-fevral kuni bo‘lib o‘tgan navbatdan tashqari sessiyasida mamlakat bosh vaziri Abdulla Aripovning faoliyati yuzasidan fikr bildirdi, deya xabar bermoqda “Daryo” muxbiri Mirolim Isajonov.
Davlat rahbari har bir vazir “Qashqadaryoga nima qildim, Namanganda nima bo‘ldi, deb”, hududlarda yurib, tumanlarning rivojlanishiga yordam berishi zarurligini ta’kidladi, chunki ular faqat “Toshkentga qorovulchilik qilish uchun” hukumat a’zosi etib tayinlanmaydi. Prezident chiqishi davomida o‘zi Samarqand viloyatiga hokim, amaldagi bosh vazir Abdulla Aripov esa O‘zbekiston pochta va telekommunikatsiyalar agentligi direktori bo‘lgan 2001—2003-yillarni eslab o‘tgan.
Samarqand viloyatiga hokim bo‘lganimda, birorta vazir bormagan. Faqat Abdulla Nig‘matovich kelib, “Shavkat Miromonovich, yangi hokim bo‘libsiz, menga topshiriq bormi?”, degan. “Toshkentda ishlasangiz ham, insofingiz bor ekan-ku”, deganman. Boshqa birorta vazir bormagan.Abdulla Aripov 2016-yil dekabridan beri O‘zbekiston bosh vaziri hisoblanadi. U 2002-yil mayidan 2012-yil avgustiga qadar — 10 yildan ortiq bosh vazir o‘rinbosari lavozimida ishlagan. Shu bilan bir vaqtda 2005—2009-yillarda O‘zbekiston aloqa va axborotlashtirish agentligini boshqargan. Aripov 2020-yil yanvarida bosh vazir lavozimiga qayta tasdiqlangan.O‘shanda vazir lavozimida ishlasa-da, viloyatdagi bir qancha muammolarni yechishda yordam bergan. Urgutda telefon yo‘qligini aytganman. Uning o‘zi uch kun shu masala bilan shug‘ullanib, masalani hal qilgan. U paytlarda tumanma-tuman yurish mumkin emas edi... Vazir shunday bo‘lishi kerak.
Bilaman, bu odam o‘zgarmaydi. Chunki uning kasbiga munosabati boshqacha va halol. Bir paytlar unga nisbatan adolatsizlik bo‘lgan, tuhmat qilishgan. Ammo shu paytgacha yonimda olib yuribman, ishonchimni oqlayapti.
Shu bois hamma vazirlar shoshilmay, balandparvoz gaplar aytmay, xalq ichida yurishi va hududlarning o‘sish nuqtalarini aniqlab, rivojlanishda ko‘maklashishi shart.
Shavkat Mirziyoyev, O‘zbekiston prezidenti
Shavkat Mirziyoyev 2020-yil yanvaridagi chiqishida Abdulla Aripovning 2016-yil sentabrida bosh vazir o‘rinbosari lavozimiga qayta tiklanishini “adolat yuzasidan” bo‘lganini ma’lum qilgan edi. Prezidentning so‘zlariga ko‘ra, bosh vazir “hayotda ko‘p og‘ir tuhmatlarga qolgan, lekin shularni jasorat bilan yengib, hech qachon singan emas”.
Izoh (0)