Markaziy saylov komissiyasining sobiq raisi Mirzo-Ulug‘bek Abdusalomov O‘zbekiston Konstitutsiyaviy sudi sudyasi etib saylandi. Tegishli qaror Oliy Majlis Senatining 5-fevral kuni bo‘lib o‘tgan navbatdagi yalpi majlisida qabul qilingan.
Mirzo-Ulug‘bek Abdusalomov 2005-yildan buyon Markaziy saylov komissiyasiga rahbarlik qilib kelgan. Avvalroq deputatlar Qonunchilik palatasi deputatlari uning MSK raisi sifatidagi, shuningdek, komissiyaning yana 6 nafar a’zosining vakolati tugatilishini ma’qullagandi.
Majlisda shuningdek, Markaziy saylov komissiyasining 8 nafar yangi a’zosi tasdiqlangan. Ular orasida Oliy Majlis Senati raisining o‘rinbosari Zayniddin Nizomxo‘jayev hamda adliya vaziri o‘rinbosari Bahrom Qo‘chqorov ham bor.
Avvalroq Markaziy saylov komissiyaning raisi Mirzo-Ulug‘bek Abdusalomovning boshqa ishga o‘tishi munosabati bilan uning o‘rniga Senat raisi o‘rinbosari Zayniddin Nizomxo‘jayev saylanishi, unga esa adliya vaziri o‘rinbosari Bahrom Qo‘chqorov o‘rinbosar bo‘lishi kutilayotgani haqida xabar berilgan edi.