Fors ko‘rfazidagi qator mamlakatlar COVID-19 bilan bog‘liq vaziyat fonida cheklovlarni kuchaytirmoqda, deya xabar bergan Associated Рress.
Saudiya Arabistonida hukumat 20 ta mamlakat, jumladan, AQShdan tashrif buyuruvchilarni qabul qilishni taqiqladi. Qirollik hududida to‘y va bazmlar o‘tkazish, restoranlarda ovqatlanishga chek qo‘yildi, savdo markazlari va sport zallari 10 kunga yopildi.
Hukumat izohiga ko‘ra, Saudiya Arabistonining bir qator hududlarida kasallanish holati ortganini xavfsizlik choralariga rioya qilinmagani sabab bo‘lgan. Shuningdek, hukumat yangi cheklovlarning muddati uzaytirilishi mumkinligi haqida ogohlantirgan. Umumiy hisobda, qirollikda koronavirusga chalinish bo‘yicha 368 mingga yaqin holat, 6380 ta o‘lim holati qayd etilgan.
Kuvayt 7-fevraldan boshlab xorijliklar uchun ikki haftaga chegaralarini yopadi. Mamlakatda ish vaqti qisqartirilib, sport zallari va sport-sog‘lomlashtirish klublari yopiladi, 25-fevralda Kuvayt milliy kuni nishonlanishi munosabati bilan o‘tkaziladigan tantanalar bekor qilinadi. Pandemiya boshidan beri mamlakatda infeksiyani yuqtirib olganlar soni 167 mingdan oshgan, 961 nafar bemor kasallik asoratlari oqibatida vafot etgan.
Qatarda ham cheklovlar joriy qilinmoqda. Ummonda esa yanvar oyining o‘rtalaridan beri quruqlikdagi chegaralar yopiq, ammo aviaqatnovlar taqiqlanmagan. Biroq shunga qaramay Ummon hukumati mamlakatda koronavirus bilan kasallanish soni ortib borayotgani haqida ogohlantirdi.
Avvalroq Ummon sog‘liqni saqlash vaziri Ahmad bin Muhammad al-Saidiy xorijlik sayyohlardan ularga o‘z sog‘lig‘ini kuzatib borish uchun taqish majburiy qilib berilgan bilaguzuklar olinib, uyidan chiqmaydigan qariyalarga berilishini aytgandi. Xabar qilinishicha, sultonlik mamlakatga kelayotganlardan bir hafta davomida ijtimoiy yakkalash tartibiga o‘tkazishni talab qiladi.
Xabarga ko‘ra, aholisining aksariyat qismi yosh va sog‘lom mehnat muhojirlaridan iborat ushbu mamlakatlarda COVID-19 oqibatida kuzatilayotgan o‘limlarning darajasi u qadar yuqori emas. Biroq 2021-yil boshidan beri mintaqada kasallikning ko‘payishi qayd etilmoqda. Shunga qaramay, mintaqaning ayrim davlatlari aholini koronavirusga qarshi emlash ko‘lami bo‘yicha dunyoda yetakchi o‘rinlarda bormoqda.
Avvalroq Saudiya Arabistoni koronavirusning yangi shtammi tufayli chegaralarni yopib, xalqaro parvozlarni to‘xtatgan haqida xabar qilingandi. Saudiya Arabistonidan tashqari yana 20 dan ortiq mamlakat yangi shtamm tufayli aviaqatnovlarni cheklagan.
Eslatib o‘tamiz, Birlashgan Arab Amirliklarining Dubay shahrida 23-dekabrdan aholini koronavirusga qarshi bepul emlash boshlangan, buning uchun Pfizer va BioNTech kompaniyalari tomonidan yaratilgan vaksinadan foydalanilmoqda.
Izoh (0)