17-fevral kuni Belarus Oliy sudi 2020-yil yozida bo‘lib o‘tgan prezidentlik saylovlarida qatnashgan “Belgazprombank”ning sobiq raisi Viktor Babarikoga nisbatan jinoyat ishini ko‘rib chiqishni boshlaydi. Bu haqda “Interfaks” xabar berdi.
Qayd etilishicha, jinoyat ishi Oliy sudga yanvar oyida kelib tushgan. 4-fevral kuni sud ishi doirasida dastlabki yig‘ilish bo‘lib o‘tgan.
Avvalroq oltita ayblanuvchi bilan sudgacha hamkorlik kelishuvlarni imzolangan. Babariko — aybini tan olishni xohlamagan yagona shaxs.
Mamlakat Bosh prokuraturasi ma’lumotiga ko‘ra, “Belgazprombank” boshqaruvining olti nafar sobiq o‘rinbosarlariga uyushgan guruh tomonidan yirik miqdordagi pora olish ayblovi e’lon qilingan. Tergov ma’lumotlariga ko‘ra, bank mijozi — “Aktivlizing” ta’sischilaridan biri va uning egasi bank xodimlariga kamida 2,476 million dollar miqdorida pora bergan.
Tergov departamenti Babariko “Belgazprombank” boshqaruv kengashi raisi sifatida muntazam ravishda biznesdan pora olish maqsadida “o‘z o‘rinbosarlaridan tashkil topgan uyushgan guruh tuzgan”, deb hisoblaydi. Bankning top-menejerlari 2004-yil boshidan 2020-yil iyun oyining o‘rtalariga qadar bir qator korporativ mijozlardan deyarli 30,5 million Belarus rubli (hozirgi kurs bo‘yicha 11,5 million dollardan ortiq) miqdorida pora olgan, deb ta’kidlamoqda Bosh prokuratura.
Bundan tashqari, Babariko 2018-yil 10-noyabrdan 27-dekabrgacha olingan pulni legallashtirish uchun Minskda 1 million rubldan ortiq narxda ikkita bino sotib olganligi uchun ayblanmoqda.
Viktor Babariko 2000-yil iyuldan 2020-yil 12-maygacha “Belgazprombank” boshqaruv kengashi raisi bo‘lgan. 2020-yil bahorida u prezident saylovlariga qatnashishga qaror qilgan. 18-iyun kuni ushlanib, hibsga olingan. Unga nisbatan Jinoyat kodeksining uchta moddasi: pul yuvish, soliqlarni chetlab o‘tish va pora olish jinoyatlari bo‘yicha ayblovlar e’lon qilingan.
19-iyunda bosh prokuror Aleksandr Konyuk “Belgazprombank” ishi qatnashchilari mamlakat milliy xavfsizligi manfaatlariga iqtisodiy hamda boshqa sohalar bo‘yicha ham zarar yetkazganini ta’kidlagan.
Shuningdek, shu kuni Belarusdagi inson huquqlari himoyachilari Babarikoni siyosiy mahbus deb topgan. Yevroittifoq Belarus hukumatidan Babarikoni ozod qilishni so‘ragan. 30-iyunda Minsk markaziy tuman sudi Babarikoning shikoyatini ko‘rib chiqib, uni garov evaziga ozod qilishni rad etgan.
Izoh (0)