Форс кўрфазидаги қатор мамлакатлар COVID-19 билан боғлиқ вазият фонида чекловларни кучайтирмоқда, дея хабар берган Associated Рress.
Саудия Арабистонида ҳукумат 20 та мамлакат, жумладан, АҚШдан ташриф буюрувчиларни қабул қилишни тақиқлади. Қироллик ҳудудида тўй ва базмлар ўтказиш, ресторанларда овқатланишга чек қўйилди, савдо марказлари ва спорт заллари 10 кунга ёпилди.
Ҳукумат изоҳига кўра, Саудия Арабистонининг бир қатор ҳудудларида касалланиш ҳолати ортганини хавфсизлик чораларига риоя қилинмагани сабаб бўлган. Шунингдек, ҳукумат янги чекловларнинг муддати узайтирилиши мумкинлиги ҳақида огоҳлантирган. Умумий ҳисобда, қиролликда коронавирусга чалиниш бўйича 368 мингга яқин ҳолат, 6380 та ўлим ҳолати қайд этилган.
Кувайт 7 февралдан бошлаб хорижликлар учун икки ҳафтага чегараларини ёпади. Мамлакатда иш вақти қисқартирилиб, спорт заллари ва спорт-соғломлаштириш клублари ёпилади, 25 февралда Кувайт миллий куни нишонланиши муносабати билан ўтказиладиган тантаналар бекор қилинади. Пандемия бошидан бери мамлакатда инфекцияни юқтириб олганлар сони 167 мингдан ошган, 961 нафар бемор касаллик асоратлари оқибатида вафот этган.
Қатарда ҳам чекловлар жорий қилинмоқда. Уммонда эса январь ойининг ўрталаридан бери қуруқликдаги чегаралар ёпиқ, аммо авиақатновлар тақиқланмаган. Бироқ шунга қарамай Уммон ҳукумати мамлакатда коронавирус билан касалланиш сони ортиб бораётгани ҳақида огоҳлантирди.
Аввалроқ Уммон соғлиқни сақлаш вазири Аҳмад бин Муҳаммад ал-Саидий хорижлик сайёҳлардан уларга ўз соғлиғини кузатиб бориш учун тақиш мажбурий қилиб берилган билагузуклар олиниб, уйидан чиқмайдиган қарияларга берилишини айтганди. Хабар қилинишича, султонлик мамлакатга келаётганлардан бир ҳафта давомида ижтимоий яккалаш тартибига ўтказишни талаб қилади.
Хабарга кўра, аҳолисининг аксарият қисми ёш ва соғлом меҳнат муҳожирларидан иборат ушбу мамлакатларда COVID-19 оқибатида кузатилаётган ўлимларнинг даражаси у қадар юқори эмас. Бироқ 2021 йил бошидан бери минтақада касалликнинг кўпайиши қайд этилмоқда. Шунга қарамай, минтақанинг айрим давлатлари аҳолини коронавирусга қарши эмлаш кўлами бўйича дунёда етакчи ўринларда бормоқда.
Аввалроқ Саудия Арабистони коронавируснинг янги штамми туфайли чегараларни ёпиб, халқаро парвозларни тўхтатган ҳақида хабар қилинганди. Саудия Арабистонидан ташқари яна 20 дан ортиқ мамлакат янги штамм туфайли авиақатновларни чеклаган.
Эслатиб ўтамиз, Бирлашган Араб Амирликларининг Дубай шаҳрида 23 декабрдан аҳолини коронавирусга қарши бепул эмлаш бошланган, бунинг учун Pfizer ва BioNTech компаниялари томонидан яратилган вакцинадан фойдаланилмоқда.
Изоҳ (0)