Uxan virusologiya institutining laboratoriyasi shu qadar mukammal qurilganki, u yerdan koronavirus sizib chiqishini tasavvur qilish qiyin. Bu haqda Jahon sog‘liqni saqlash tashkiloti (JSST)ning Rossiyadagi guruhi a’zosi, Paster nomidagi Sankt-Peterburg epidemiologiya va mikrobiologiya ilmiy-tadqiqot instituti direktori o‘rinbosari Vladimir Dedkovning bayonotiga asoslanib “RBK” yozmoqda.
Koronavirus infeksiyasining paydo bo‘lish sabablarini o‘rganayotgan JSST ekspertlari 3-yanvar kuni Uxan virusologiya institutiga tashrif buyurdi. Avvalroq mutaxassislar Xuanan dengiz mahsulotlari bozoriga va shahardagi eng katta go‘sht mahsulotlari sotiladigan Bayshachjou bozoriga borgan edi. Ungacha ular Uxandagi bemorlarni birinchilardan bo‘lib davolagan ikkita kasalxonada bo‘lgan.
“Bizning missiyamiz uchun, albatta, ushbu muassasaga tashrif buyurish, hamkasblar bilan muloqot qilish, u yerdagi sharoit qanday tashkil etilganligini ko‘rish juda muhim edi. Ularni kim tanqid qilganini bilmayman, ammo laboratoriya maqtovga loyiq darajada qurilgan. Men u yerdan biror kasallik tarqalishini xayolimga sig‘dirolmayman”,— dedi Dedkov.
Uning so‘zlariga ko‘ra, gipoteza jihatidan hamma narsa sodir bo‘lishi mumkin, ammo koronavirusning Uxan laboratoriyasidan tarqalishi haqida hech qanday dalillar yo‘q, virus paydo bo‘lishiga olib keladigan zarurat ham bo‘lmagan. Dedkov, shuningdek, Uxan shahridagi dengiz mahsulotlari bozorida koronavirus infeksiyasining paydo bo‘lishi uchun barcha sharoitlar mavjudligini ta’kidladi, chunki u sanitariya qoidalari nuqtayi nazaridan talablarga umuman javob bermaydi.
“Hamma narsa zich, bozor kichkina va nihoyatda gavjum. Har qanday infeksiya tarqalishi sanitariya me’yorlariga rioya qilinmasligidan kelib chiqadi. Koronavirus ham shu tarzda paydo bo‘lganmi yoki yo‘q, buni bilmaymiz, ammo sabab faqat shunda bo‘lsa, juda yaxshi bo‘lardi.” — deya ta’kidladi mutaxassis.
Yanvar oyi boshida AQSh prezidentining Milliy xavfsizlik masalalari bo‘yicha maslahatchisi o‘rinbosari Mettyu Pottinger koronavirus infeksiyasi katta ehtimol bilan Xitoyning Uxan shahridagi laboratoriyadan sizib chiqqani haqida “tobora ko‘payib borayotgan dalillar” borligini aytgan. Trampning o‘zi oldinroq bu haqda gapirib, bir necha bor XXR rahbariyatini virus tarqalishi haqidagi ma’lumotlarni yashirishda ayblagan.
Izoh (0)