Qirg‘izistonning yangi bosh vaziri Ulug‘bek Maripov o‘zining qondosh ukasi Baxitbek Maripovni O‘sh viloyatining Novqat tumani hokimligi lavozimidan chetlatdi. Bu haqda “24.kg” xabar bergan.
Bu Qirg‘iziston hukumati rahbarining bosh vazirlik kursisiga o‘tirganidan keyin amalga oshirgan dastlabki harakatlaridan biri bo‘ldi, Ulug‘bek Maripov manfaatlar to‘qnashuvi sodir bo‘lmasligini ta’minlash uchun ham shunday qaror qabul qilgan.
Qirg‘izistonda mahalliy o‘zini o‘zi boshqarish organlari ijro hokimiyatining bir qismi hisoblanadi va to‘g‘ridan to‘g‘ri bosh vazirga bo‘ysunadi.
Eslatib o‘tamiz, 2021-yil 3-fevralda Qirg‘iziston parlamenti 41 yoshli Ulug‘bek Maripov nomzodini bosh vazir lavozimiga tasdiqlagan. U avval Qirg‘iziston hukumatidagi turli rahbarlik lavozimlarida, jumladan, mamlakat moliya vazirligi, prezident devoni, Favqulodda vaziyatlar vazirligi, hukumat devonida, shuningdek, sobiq prezident Almazbek Atambayevning yordamchisi sifatida ishlagan.
Mavzuga doir:
- Abdulla Aripov Ulug‘bek Maripovni Qirg‘iziston bosh vaziri etib tayinlangani bilan tabrikladi
- Qirg‘iziston prezidenti Mudofaa vazirligini qayta tuzishga qaror qildi
- Qirg‘iziston prezidenti matbuot xizmatining rahbari pora olish uchun tovlamachilik bilan shug‘ullanganlikda gumon qilinib hibsga olindi
Izoh (0)