Xitoyning internet giganti Tencent Holdings Ltd. korrupsiyada gumon qilingan 100 dan ortiq xodimni ishdan oldi va bunday ishga aloqador 37 kompaniyani qora ro‘yxatga kiritdi, deb xabar bermoqda “Interfaks”.
Kompaniya to‘rtinchi chorakdan boshlab o‘g‘rilik va pora olishda gumonlangan 60 dan ortiq ish ustida tergov jarayonini olib borgan. Gumon qilinayotgan jinoyatlar bilan bog‘liq 40 nafarga yaqin kishi huquqni muhofaza qilish idoralariga tekshiruvga berilgan.
Xabarda aytib o‘tilgan holatlar qatorida Interactive Entertainment Group, Platform & Content Group va Cloud & Smart Industries Group kompaniyalarining sobiq xodimlari ham bor.
Tencent korrupsiyaga qarshi kurashish siyosatining har qanday buzilishlariga nisbatan “nol toqatsizlik” ko‘rsatishini va chetdagi tashkilotlar aralashgan holatlarda politsiya bilan yaqindan hamkorlik qilishini ta’kidlagan.
3-fevral kungi Gonkong savdolarida Tencent aksiyalari 1,6 foizga ko‘tarilgan. Joriy yil boshidan buyon kompaniyaning kapitallashuvi 30,5 foizga o‘sgan.
Tencent Holdings Xitoyning yirik kompaniyalaridan biri bo‘lib, u WeChat messenjeri va bir qator ommaviy onlayn o‘yinlar yaratuvchisidir. Hozirda kompaniya onlayn to‘lovlar, mobil va telekommunikatsiya xizmatlari va onlayn reklama sohasida yetakchi hisoblanadi.
Izoh (0)