Германиянинг BioNTech компанияси билан ҳамкорликда коронавирусга қарши вакцина ишлаб чиққан Американинг Pfizer компанияси 2021 йилда ушбу дори сотувидан 15 миллиард доллар фойда олиши кутилмоқда. Йил охирига қадар компания жами 59,4-61,4 миллиард доллар даромад кўришни прогноз қиляпти. Бу ҳақда Bloomberg маълумотларига таяниб, «РБК» хабар берди.
Pfizer ва BioNTech вакцинаси АҚШ ва Европа Иттифоқи мамлакатларида тасдиқланган биринчи вакцина бўлди. Бироқ Johnson & Johnson ва Novavax компанияларининг вакциналари яқинда Pfizer’нинг рақобатчиларига айланиши мумкин. Бундан ташқари, COVID-19’нинг янги штаммлари қўшимча дори воситалари ишлаб чиқишни талаб қилиши мумкин.
Pfizer COVID-19 вакцинасининг бир дозаси учун анча юқори — 19,5 доллар нарх белгилаган. Британиянинг AstraZeneca компанияси, вакцинасининг нархи бир доза учун 4 доллардан кам бўлишини айтганди. АҚШ мазкур вакцинадан фойдаланиш учун ҳали рухсат бермаган. Johnson & Johnson ўз вакцинаси нархини 10 доллардан кам қилиб белгилашни режалаштирмоқда.
«2021 йилги прогнозга, биринчи навбатда, амалдаги шартномалар бўйича жорий йилда етказиб берилиши кутилаётган дозалар киради», — дейилади компания хабарида.
Вакцинани ҳисобга олмаганда, Pfizer 2021 йилда 44,4-46,4 миллиард доллар атрофида фойда олишни кутмоқда. Компаниянинг ҳар бир акциясидан келадиган фойда 3,10 дан 3,20 долларгача бўлиши башорат қилинмоқда.
Дастлаб Pfizer ва BioNTech 2021 йилда 1,3 миллиард доза вакцина ишлаб чиқаришни режалаштирганди. Энди улар доза миқдорини 2 миллиардгача чиқармоқчи.
Bloomberg Vaccine Tracker маълумотларига кўра, бугунги кунда Pfizer ва BioNTech 836 миллион доза вакцина етказиб бериш бўйича келишувлар имзолаган, жумладан, Европа Иттифоқи учун 300 миллион ва АҚШ учун 200 миллион дозада вакцина етказиб беради.
Ҳозирга қадар АҚШ ва Европа Иттифоқи регуляторлари Pfizer ва Moderna вакциналарини қўллашни маъқуллаган. Мамлакатларда ушбу вакциналар билан эмлаш аллақачон бошланган.
Хабарга кўра, Қўшма Штатларда коронавирусга қарши тасдиқланган иккита вакцинанинг ҳеч бўлмаганда биттасини олганлар сони бутун пандемия давомида мамлакатда COVID-19’га чалинганлар сонидан ошиб кетди. Айни пайтда мамлакатда 26,5 миллион киши эмланган. Жонс Ҳопкинс университети маълумотларига кўра, эпидемия бошланганидан бери Қўшма Штатларда 26,3 миллион кишида коронавирус инфекцияси аниқланган.
Эслатиб ўтамиз, Норвегияда Pfizer/BioNTech коронавирусга қарши вакцинасини қабул қилган 23 киши вафот этган.
Аввалроқ экспертлар Pfizer вакцинаси қўлланганидан кейин келиб чиқаётган ўлимларга изоҳ берганди. Уларнинг фикрича, эмланганда кейинги иккиламчи таъсирлар ва асоратлар вакцина тури ёки унинг аҳолининг касалликка мойил гуруҳларида қўлланилиши билан боғлиқ бўлиши мумкин.
Изоҳ (0)