Хонанда Жасур Умировга нисбатан номусга тегиш иши бўйича дастлаб жиноий иш қўзғатишни рад этган Каттақўрғон ИИБ Тергов бўлими терговчисининг ҳаракатлари прокуратура томонидан ўрганилмоқда. Бу ҳақда Самарқанд вилояти прокуратураси маълум қилди.
Вояга етмаган Ш.М.ни мажбурлаб номусига текканлиги ҳолати юзасидан Жасур Умировга нисбатан қўзғатилган жиноят иши суд томонидан кўриб чиқилиб, хонанда ва унинг икки шериги айбдор деб топилиб, уларга озодликдан маҳрум қилиш жазоси тайинланганди.
«Ҳозирда ушбу ҳолат бўйича дастлаб терговга қадар текшириш ҳаракатлари олиб бориб, юз берган ҳолатда бирор-бир шахснинг ҳаракатида жиноят аломатлари мавжуд эмаслиги ҳақидаги асос билан ЖПКнинг 83-моддаси 2-бандига асосан жиноят иши қўзғатишни рад этиш ҳақида қарор қабул қилган Каттақўрғон туман ИИБ ТБ терговчисининг ҳаракатлари бўйича Каттақўрғон шаҳар прокуратураси томонидан терговга қадар текшириш ҳаракатлари олиб борилмоқда», — дейилади Самарқанд вилояти прокуратураси хабарида.
Вилоят прокуратураси томонидан Telegram’да эълон қилинган хабарда одатда мансабдорлар пора билан қўлга тушганда қўлланиладиган иллюстратив суратдан фойдаланилган. Унда чўнтагидан бир қанча доллар кўриниб турган эркакнинг қўлига кишан солингани тасвирланган.
Эслатиб ўтамиз, 2020 йил 17 июнь куни Ургут туманида яшовчи фуқаро Ф.Р. Каттақўрғон тумани ИИБ бошлиғига ариза билан мурожаат қилган. Унда 13 июнь куни вояга етмаган қизи Ш.М.ни дугонаси Д.С. Каттақўрғон туманига олиб келиб, уни қўшиқчи Жасур Умиров ва унинг бир ўртоғи билан таништиргани, улар қизларни бир уйга олиб борганлиги ва шу куни хонанда қизи Ш.М.ни зўрлаб номусига текканлигини, шу сабабли Жасур Умировга нисбатан қонуний чора кўришни сўраган.
Судга оид тиббиёт экспертизанинг 26 июндаги хулосасида фуқаро Ш.М.нинг танасида, яъни кўз юқори қовоқлар, иккала болдир, ўнг билак соҳаларида қонталашлар каби жароҳатлар аниқланиб, ушбу жароҳатлар суд-тиббий текширувига қадар бир кундан кўп, икки кундан кам бўлган вақт оралиғида етказилган бўлиши мумкинлиги кўрсатилган.
Мазкур мурожаат юзасидан Каттақўрғон туман ИИБ ҳузуридаги ТБ терговчиси томонидан терговга қадар текшириш ҳаракатлари ўтказилиб, унга кўра, 10 июль куни Жиноят процессуал кодексининг 83-моддаси 2-бандига (гумонланувчининг қилмишида жиноят таркиби бўлмаса, айбсиз деб топиш) асосан жиноят иши қўзғатишни рад этиш ҳақида қарор қабул қилинган.
Орадан икки ой ўтиб — 10 сентябрь куни «Kun.uz» сайтида вояга етмаган қизнинг номусига теккани айтилган хонандага нисбатан ИИБ жиноят иши қўзғатишни рад қилгани ҳақида мақола эълон қилинди. Мақолада Ш.М. хонанда унга маст қилувчи ичимлик ичириб, кейин куч ишлатиб зўрлаганини, Жасур Умировнинг шериклари унга пичоқ ўқталиб қўрқитганини сўзлаб берган. Хонанданинг ўзи нашр билан суҳбатда қизнинг хоҳиши билан жинсий алоқада бўлгани, қизнинг вояга етмаганидан бехабар бўлганини айтган. Шунингдек, қизнинг отаси шантаж қилиб, ундан уй талаб қилганини таъкидлаган.
11 сентябрь куни Бош прокуратура баёнот берди. Унда «тўпланган ҳужжатлар Самарқанд вилояти прокуратураси томонидан назорат тартибида ўрганиб чиқилганда, бир қатор терговга қадар текширув ҳаракатлари тўлиқ бажарилмаганлиги, терговчи Жиноят процессуал кодексининг 22-моддасида кўрсатилган жиноят юз берганлигини, унинг содир этилишида ким айбдорлигини, шунингдек, у билан боғлиқ барча ҳолатларни аниқлаш шартлигини, иш бўйича исботланиши лозим бўлган барча ҳолатлар синчковлик билан ҳар томонлама, тўла ва холисона текшириб кўрилмасдан шошма-шошарлик билан қабул қилинганлиги аниқланган»лиги айтилган. Шу сабабли Каттақўрғон туман ИИБ ҳузуридаги ТБнинг 10 июль кунги жиноят иши қўзғатишни рад этиш тўғрисида қабул қилган қарор Самарқанд вилояти прокуратураси томонидан 10 сентябрь куни бекор қилиниб, қўшимча текширув ҳаракатлари олиб борилишлик учун Каттақўрғон туман ИИБ ТБга юборилган.
Кейинроқ Самарқанд вилояти ИИБ ҳузуридаги Тергов бошқармаси томонидан жиноят иши қўзғатилиб, 21 декабрь куни эса Жасур Умиров қамоққа олинганди.
2021 йил 2 февраль жиноят ишлари бўйича Каттақўрғон шаҳар судида Жасур Умиров ва унинг икки шеригига нисбатан жиноят ишини кўриб чиқиш бўйича суд жараёни ниҳоясига етди ва суд ҳукми эълон қилинди. Ҳукмга кўра, Жасур Умиров Жиноят кодексининг 118-моддаси (номусга тегиш) 1-қисми билан айбли деб топилиб, унга 5 йил муддатга озодликдан маҳрум қилиш жазоси тайинланди. Унинг икки шериги эса 1,5 йилга озодликдан маҳрум қилинди.
Изоҳ (0)