Namanganlik fuqaro qarzga pitssa tayyorlab berishni xohlamagan kafe rahbariga pichoq bilan hujum qildi. Bu haqda viloyat IIB axborot xizmati xabar berdi.
Ma’lum qilinishicha, B.N. ismli fuqaro 30-yanvar kuni soat 03:00 larda mast holda Davlatobod tumanida joylashgan kafega kelib, kafe rahbariga pitssani qarzga olib ketishini aytib, sovuq qurol va temir tayoq (bita) bilan tahdid qilgan. Kafe rahbari nasiyaga savdo qilmasligini aytgach, yonida bo‘lgan o‘tkir tig‘li jism bilan uning chap ko‘krak qafasi orqa yuzasiga urib, tan jarohati yetkazgan.
Shuningdek, B.N. shu kuni ukasi G‘.N. boshqaruvidagi Spark’da ketayotib, soat 06:30 larda chorrahada turgan Malibu’ning yo‘lini to‘sgan va hech bir sababsiz pichoq hamda temir tayoq bilan avtomobilning old eshik oynasi va orqani ko‘rsatuvchi yon oynalarini urib sindirib, haydovchiga tan jarohati yetkazgan.
Mazkur holat yuzasidan Davlatobod tumani IIB huzuridagi tergov bo‘limi tomonidan aka-ukaga nisbatan Jinoyat kodeksining 277-moddasi bilan jinoyat ishi qo‘zg‘atilgan. Hozirda tergov harakatlari olib borilmoqda.
Avvalroq Toshkentda 17 yoshli maktab o‘quvchisi o‘z otasini pichoqlab o‘ldirib qo‘ygani, Qashqadaryoda mast erkak xotini va qaynsinglisini pichoqlagani, shuningdek, buxorolik ayol rashk sabab erini pichoqlab qo‘ygani to‘g‘risida xabar berilgandi.
Izoh (0)