“Shuncha yerimiz bo‘la turib, odamlarimiz chetda ish izlab yuribdi”. Mirziyoyev yoshlarga 1 gektargacha yer ajratish bo‘yicha Shuhrat G‘aniyevga topshiriq berdi

2020-yilda dehqonchilik bilan shug‘ullanish uchun yer so‘rab, murojaat qilgan 14 ming nafar yoshning atigi 3 ming nafariga yer berilgan. Bu haqda 27-yanvar, chorshanba kuni Prezident Shavkat Mirziyoyev raisligida o‘tkazilgan yig‘ilishda ma’lum qilindi, deya xabar bermoqda “Daryo” muxbiri.

Davlat rahbarining ta’kidlashicha, 2020-yili Jizzax viloyatida 5 ming nafar, Xorazmda 2,5 ming, Qashqadaryoda 2 ming, Sirdaryoda ming nafar yigit-qiz dehqonchilik uchun yer ajratishni so‘rab murojaat qilgan.

“Shu sababli Shuhrat G‘aniyev va Aktam Xayitov viloyat hokimlari bilan birga joriy yilda 10 sotixdan 1 gektargacha yer ajratish orqali 10 ming nafar, issiqxona qurish, limonchilik, parrandachilik, quyonchilik, asalarichilik uchun kredit berish hisobidan 8 ming nafar, zaxira yerlarini oborotga kiritish uchun quduq qazib berish orqali ming nafar, g‘alladan bo‘shagan yerlarda takroriy ekin ekish orqali 20 ming nafar yoshlarning bandligi ta’minlanadi.

Shuningdek, ‘Turonbank’ tomonidan limonchilikni rivojlantirishga 50 milliard so‘m yo‘naltirilib, 4 ming nafar yosh bandligi ta’minlanishi lozim”, — dedi Shavkat Mirziyoyev.

Yig‘ilishda Sirdaryo hokimi G‘ofurjon Mirzayevning ta’kidlashicha, hozirda viloyatda 2684 ta fermer xo‘jaligi mavjud bo‘lib, ular o‘rtacha 80 gektardan yer maydoniga ega.

Prezident bu ma’lumotdan so‘ng Mirzayevga 2021-yilning o‘zida har bir fermer 2 gektardan yerini 4 nafar yoshga bo‘lib berishi kerakligini aytdi.

“Har bir fermer 2 gektardan yerini yarim gektardan qilib, 4 nafar yoshga bo‘lib bersin. Ular bu yerga istagan ekinini eksin, hech kim aralashmaydi. Shuncha yerimiz bo‘la turib, odamlarimiz chetda ish izlab yuribdi. Bu tizim hamma viloyatda joriy qilinadi. Shu orqali kamida 10 mingdan ortiq yoshning bandilini ta’minlagan bo‘lamiz”, — dedi davlat rahbari.