Наманганлик фуқаро қарзга пицца тайёрлаб беришни хоҳламаган кафе раҳбарига пичоқ билан ҳужум қилди. Бу ҳақда вилоят ИИБ ахборот хизмати хабар берди.
Маълум қилинишича, Б.Н. исмли фуқаро 30 январь куни соат 03:00 ларда маст ҳолда Давлатобод туманида жойлашган кафега келиб, кафе раҳбарига пиццани қарзга олиб кетишини айтиб, совуқ қурол ва темир таёқ (бита) билан таҳдид қилган. Кафе раҳбари насияга савдо қилмаслигини айтгач, ёнида бўлган ўткир тиғли жисм билан унинг чап кўкрак қафаси орқа юзасига уриб, тан жароҳати етказган.
Шунингдек, Б.Н. шу куни укаси Ғ.Н. бошқарувидаги Spark’да кетаётиб, соат 06:30 ларда чорраҳада турган Malibu’нинг йўлини тўсган ва ҳеч бир сабабсиз пичоқ ҳамда темир таёқ билан автомобилнинг олд эшик ойнаси ва орқани кўрсатувчи ён ойналарини уриб синдириб, ҳайдовчига тан жароҳати етказган.
Мазкур ҳолат юзасидан Давлатобод тумани ИИБ ҳузуридаги тергов бўлими томонидан ака-укага нисбатан Жиноят кодексининг 277-моддаси билан жиноят иши қўзғатилган. Ҳозирда тергов ҳаракатлари олиб борилмоқда.
Аввалроқ Тошкентда 17 ёшли мактаб ўқувчиси ўз отасини пичоқлаб ўлдириб қўйгани, Қашқадарёда маст эркак хотини ва қайнсинглисини пичоқлагани, шунингдек, бухоролик аёл рашк сабаб эрини пичоқлаб қўйгани тўғрисида хабар берилганди.
Изоҳ (0)