O‘zbekistonda xorijda ishlab chiqariladigan 529 turdagi tovar va xizmatlarni davlat xaridlari sifatida import qilish taqiqlandi. Bu haqda Vazirlar Mahkamasining “Mahalliy ishlab chiqaruvchilarni qo‘llab-quvvatlash chora-tadbirlari to‘g‘risida”gi qarorida belgilandi.
Ro‘yxatga, jumladan, quyidagilar kiritildi:
- oziq-ovqat mahsulotlari (shokolad, kungaboqar yog‘i, sut mahsulotlari, go‘sht va hokazo);
- farmatsevtika mahsulotlari (dori vositalari va tibbiyot buyumlari);
- transport va uning ehtiyot qismlari (shinalar, ehtiyot qismlari);
- maishiy texnikalar (konditsioner, muzlatkich, monitor, kir yuvish mashinasi, televizor va hokazo);
- traktorlar, yengil va yuk avtomobillari.
Qayd etilishicha, bu jahon koronavirus pandemiyasining iqtisodiyotga salbiy ta’sirini kamaytirish, savdo bozorlarining qisqarishi oqibatida iqtisodiyotning qator tarmoq va sohalaridagi korxonalarning ishlab chiqarish faolligini cheklovchi omillarni qisqartirish, shuningdek, mahalliy sanoat mahsulotlari ishlab chiqarish hajmlarini kengaytirish maqsadida amalga oshiriladi.
Shu bilan birga, taqiqlangan tovarlarni olib kirish ma’lum shartlarda ruxsat beriladi. Import qiluvchi chet eldan import qilinishi rejalashtirilgan ma’lum bir mahsulot turini olib kirish uchun davlat buturtmachisini ishchi organiga ariza bilan murojaat qiladi. Unda import qilinishi rejalashtirilgan mahsulot ro‘yxatda keltirilgan tovarlardan farqlari to‘g‘risidagi ma’lumot ham keltiriladi.
Taklif tasdiqlash uchun yuboriladi va u 8 bosqichdan o‘tganidan so‘ng ariza ma’qullanganligi yoki rad etilganligi ma’lum qilinadi.
Izoh (0)