Qashqadaryo viloyati hokimi Zoir Mirzayev 2021-yil 1-fevraldan qisqa muddatli mehnat ta’tiliga chiqdi va 31-yanvar, yakshanba kuni Toshkent shahriga jo‘nab ketdi. Bu haqda viloyat hokimligi axborot xizmati ma’lum qildi.
Hokimlik axborot xizmatining yozishicha, Zoir Mirzayevning o‘rinbosarlariga tenglashtirilgan hokim maslahatchilari ham qisqa muddatli davolanish ta’tiliga chiqib, viloyat shifoxonalarida salomatligini tiklab oladi.
“Daryo” muxbiri bilan suhbatlashgan Zoir Mirzayevning matbuot kotibi Ahror Sodiqovning ma’lumot berishicha, ayni kunda viloyat rahbarining o‘rinbosarlarga tenglashtirilgan 6 nafar maslahatchisi mavjud.
Aniqlanishicha, 1-fevraldan nafaqat viloyat rahbari, viloyat prokurori, IIB boshlig‘i va soliqchilar rahbari ham mehnat ta’tiliga chiqadi.
Viloyat hokimi Zoir Mirzayev 2021-yil 17-yanvar kuni viloyatdagi barcha tuman hokimlari va o‘rinbosarlarini mehnat ta’tiliga kuzatgandan so‘ng ularning o‘rniga yoshlarni 10 kunga rahbar etib tayinlagandi. Biroq Zoir Mirzayev o‘zining o‘rnini yoshlarga ishonmadi. Demak, katta ehtimol bilan Zoir Mirzayevning ta’tili tugagunga qadar viloyatni boshqarish uning birinchi o‘rinbosari O‘tkir Bo‘tayevga ishonib topshiriladi.
“To‘g‘risi, barcha tuman va shaharlarga 10 kunga yosh hokimlar tayinlangach, viloyat rahbari ta’tili paytida ham bu mas’uliyat qaysidir yoshga ishonib topshiriladi, deb o‘ylagandik. Biroq bunday bo‘lmadi. Bunga balki, Yakkabog‘ voqeasi sabab bo‘lgandir. Balki, umuman bu rejada bo‘lmagandir”, — deydi viloyatdagi faol bloger Otabek Ortiqov.
Eslatib o‘tamiz, avvalroq viloyatda 10 kun muddatga hokimlik vazifasini bajarishga kirishgan yosh hokimlar haqida xabar berilib, Dehqonobodni boshqargan Adham Qulmamatovning tumandagi zavodga borib, qancha yoshni ishli qilgani bilan qiziqqani, Yakkabog‘ hokimi vazifasini bajaruvchi Setora Ergasheva esa unga murojaat qilgan fuqaro bilan tortishib qolib, “opa, siz menga ‘ponyatka’ bermang”, degani, Shahrisabz shahrining yosh hokimi Sabrina Tursunova shahardagi “roddom”ning bir qismi sotilgani haqidagi murojaatni tinglab, masalaga oydinlik kiritgani haqida xabar berilgandi.
Izoh (0)