Avstraliyada it daryoda oqib ketayotgan bola hayotini saqlab qoldi

Janubiy Avstraliyaning Port Noarlung shahrida it daryoda oqib ketayotgan bolani qutqarib qoldi. Bu haqda Daily Mail nashri xabar berdi.

Ma’lum bo‘lishicha, avstraliyalik Rob Osborn Maks laqabli iti bilan birga sohilda sayr qilayotgan vaqt daryoda oqib ketayotgan bolaga ko‘zi tushgan.

Erkak suvga o‘zini tashlab bolani qutqarmoqchi bo‘lgan, ammo iti Maks undan avvalroq bola tomon suzib borayotganining guvohi bo‘lgan. Robning aytishicha, oqim chuqurlik tomon olib ketayotgan bolaning halok bo‘lishiga bir baxya qolgan.

Osborn bolaga baland ovoz bilan itning ismini aytib chaqirishini va Maksga kiydirilgan qutqaruv jileti belbog‘ini ushlab olishini aytgan. Bolakay belbog‘ni ushlab olganidan keyin it uni qirg‘oqqa olib chiqqan. Egasi Maksni shunchaki aytilgan ishni bajarganini ta’kidlab, itini qahramon deb atagan.

Ma’lumot uchun, bulldog va staffordshir bulteryer zotli itlar agressiv bo‘lgani uchun ularni uyda saqlab bo‘lmasligi aytiladi. Maks ham mazkur zotga mansub bo‘lishiga qaramay, kerakli vaqt va joyda jonbozlik ko‘rsata olgani ushbu fikrlarning o‘zgarishiga hissa qo‘shadi, deyiladi xabarda.

Avvalroq Xitoyda qora pantera laqabli itning mashina urib yuborgan mushukni sudrab, yo‘l chetiga olib o‘tgani haqida xabar berilgandi.