Samarqand viloyati aholisining 15 ming nafari mart oyi o‘rtalarigacha COVID-19’ga qarshi emlanadi. Bu haqda Samarqand viloyati Sanitariya-epidemiologik osoyishtalik va jamoat salomatligi boshqarmasi rahbari Adham Baxromov ma’lum qildi.
“Ayni paytda O‘zbekiston Rossiyada ishlab chiqarilayotgan ‘Sputnik V’ vaksinasini sotib olish bo‘yicha muzokaralar olib borilmoqda. 100 ming doza vaksina olib kelish rejalashtirilmoqda, ammo bu masala hali muhokama qilinmoqda, chunki vaksina o‘z yurtida klinik sinovlarning uchinchi bosqichidan o‘tmoqda”, — degan u STV’ga bergan intervyusida.
Shuningdek, O‘zbekiston bo‘yicha 9000 nafar ko‘ngilli Xitoyning Zhifei Longcom Biopharmaceutical kompaniyasi tomonidan ishlab chiqilgan vaksina bilan emlanganini, ularning 4500 nafari klinik sinovlarning ikkinchi bosqichidan o‘tganini qayd etgan. Adham Baxromovning aytishicha, ushbu vaksina sinovining birinchi va ikkinchi bosqichi muvaffaqiyatli o‘tdi, ko‘ngillilarning hech birida nojo‘ya ta’sir kuzatilmadi.
“Shu o‘rinda koronavirusga qarshi emlanish ahamiyatini alohida qayd etishni xohlardim. Hozirda biz mintaqadagi aholining qancha qismi ushbu virus bilan kasallanganini aniq bilmaymiz. Bu ko‘plab holatlarda kasallik alomatlarsiz yoki yengil formada o‘tayotganligi bilan bog‘liq. Kasallikdan keyin shakllangan immunitet qancha barqaror turishini, yangi paydo bo‘lgan shtammlar o‘zini qanday tutishini va odamzot yana qanday muammolar bilan duch kelishini haligacha bilmaymiz”, — degan viloyat Sanitariya-epidemiologik osoyishtalik va jamoat salomatligi boshqarmasi rahbari.
Samarqand viloyati aholisini ommaviy emlash masalasiga to‘xtalgan Adham Baxromov bu masalaga o‘ta ehtiyotkorlik bilan yondashish kerakligini ta’kidlagan. Vaksina qiluvchi xodimlarni, viloyat sog‘liqni saqlash boshqarmasi xodimlarini, qabul qilinadigan vaksinani saqlash va transportirovka qilish sharoitini hisobga olgan holda emlash joylarini tayyorlash kerakligini bildirgan.
“Samarqand viloyatida fevralning oxiri, martning boshida 15 ming kishi koronavirusga qarshi emlanadi. Vaksinani birinchi navbatda tibbiyot xodimlari va sog‘liqni saqlash tizimidagilar, surunkali kasalligi bor katta yoshdagi kishilar oladi. Bosqichma-bosqich tarzda maktab o‘qituvchilari va bolalar bog‘chalari tarbiyalovchilari emlanadi. Bolalar ham chetda qolmaydi”, — degan u.
Viloyat aholisini emlashning shartli joyi sifatida 2-sonli Oilaviy poliklinika tanlanishi kutilmoqda. Tuman va shaharlar aholisi ko‘p tarmoqli poliklinikalar negizida tashkil etilgan hududiy emlash punktlarida emlanadi.
Avvalroq Sanitariya-epidemiologik osoyishtalik va jamoat salomatligi xizmati rahbarining o‘rinbosari Botir Qurbonov O‘zbekiston aholisini koronavirusga qarshi emlash fevral oyining oxiri, mart oyining boshida boshlanishini aytgandi.
Nurmat Otabekov 29-yanvar kuni “O‘zbekiston 24” kanaliga bergan intervyusida O‘zbekistonda dastlabki bosqichda 50 mingga yaqin kishi COVID-19’ga qarshi emlanishini ma’lum qildi.
Ma’lumot uchun, O‘zbekistonda ayni vaqtda Xitoyning Anhui Zhifei Loncom Biofarmaceutical kompaniyasi tomonidan yaratilgan ZF 2001 rekombinant vaksinasining sinovlari davom etmoqda. Shuningdek, Rossiyaning “Sputnik V” vaksinasini O‘zbekistonda ishlab chiqarishni mahalliylashtirish rejasi ham mavjud. Umuman, O‘zbekistonda koronavirusga qarshi vaksinalar ishlab chiqarishni yo‘lga qo‘yish rejalashtirilayotgani haqida 2020-yilning noyabrida ma’lum bo‘lgandi.
Izoh (0)