Самарқанд вилояти аҳолисининг 15 минг нафари март ойи ўрталаригача COVID-19’га қарши эмланади. Бу ҳақда Самарқанд вилояти Санитария-эпидемиологик осойишталик ва жамоат саломатлиги бошқармаси раҳбари Адҳам Бахромов маълум қилди.
«Айни пайтда Ўзбекистон Россияда ишлаб чиқарилаётган ‘Спутник V’ вакцинасини сотиб олиш бўйича музокаралар олиб борилмоқда. 100 минг доза вакцина олиб келиш режалаштирилмоқда, аммо бу масала ҳали муҳокама қилинмоқда, чунки вакцина ўз юртида клиник синовларнинг учинчи босқичидан ўтмоқда», — деган у STV’га берган интервьюсида.
Шунингдек, Ўзбекистон бўйича 9000 нафар кўнгилли Хитойнинг Zhifei Longcom Biopharmaceutical компанияси томонидан ишлаб чиқилган вакцина билан эмланганини, уларнинг 4500 нафари клиник синовларнинг иккинчи босқичидан ўтганини қайд этган. Адҳам Бахромовнинг айтишича, ушбу вакцина синовининг биринчи ва иккинчи босқичи муваффақиятли ўтди, кўнгиллиларнинг ҳеч бирида ножўя таъсир кузатилмади.
«Шу ўринда коронавирусга қарши эмланиш аҳамиятини алоҳида қайд этишни хоҳлардим. Ҳозирда биз минтақадаги аҳолининг қанча қисми ушбу вирус билан касалланганини аниқ билмаймиз. Бу кўплаб ҳолатларда касаллик аломатларсиз ёки енгил формада ўтаётганлиги билан боғлиқ. Касалликдан кейин шаклланган иммунитет қанча барқарор туришини, янги пайдо бўлган штаммлар ўзини қандай тутишини ва одамзот яна қандай муаммолар билан дуч келишини ҳалигача билмаймиз», — деган вилоят Санитария-эпидемиологик осойишталик ва жамоат саломатлиги бошқармаси раҳбари.
Самарқанд вилояти аҳолисини оммавий эмлаш масаласига тўхталган Адҳам Бахромов бу масалага ўта эҳтиёткорлик билан ёндашиш кераклигини таъкидлаган. Вакцина қилувчи ходимларни, вилоят соғлиқни сақлаш бошқармаси ходимларини, қабул қилинадиган вакцинани сақлаш ва транспортировка қилиш шароитини ҳисобга олган ҳолда эмлаш жойларини тайёрлаш кераклигини билдирган.
«Самарқанд вилоятида февралнинг охири, мартнинг бошида 15 минг киши коронавирусга қарши эмланади. Вакцинани биринчи навбатда тиббиёт ходимлари ва соғлиқни сақлаш тизимидагилар, сурункали касаллиги бор катта ёшдаги кишилар олади. Босқичма-босқич тарзда мактаб ўқитувчилари ва болалар боғчалари тарбияловчилари эмланади. Болалар ҳам четда қолмайди», — деган у.
Вилоят аҳолисини эмлашнинг шартли жойи сифатида 2-сонли Оилавий поликлиника танланиши кутилмоқда. Туман ва шаҳарлар аҳолиси кўп тармоқли поликлиникалар негизида ташкил этилган ҳудудий эмлаш пунктларида эмланади.
Аввалроқ Санитария-эпидемиологик осойишталик ва жамоат саломатлиги хизмати раҳбарининг ўринбосари Ботир Қурбонов Ўзбекистон аҳолисини коронавирусга қарши эмлаш февраль ойининг охири, март ойининг бошида бошланишини айтганди.
Нурмат Отабеков 29 январь куни «Ўзбекистон 24» каналига берган интервьюсида Ўзбекистонда дастлабки босқичда 50 мингга яқин киши COVID-19’га қарши эмланишини маълум қилди.
Маълумот учун, Ўзбекистонда айни вақтда Хитойнинг Anhui Zhifei Loncom Biofarmaceutical компанияси томонидан яратилган ZF 2001 рекомбинант вакцинасининг синовлари давом этмоқда. Шунингдек, Россиянинг «Спутник V» вакцинасини Ўзбекистонда ишлаб чиқаришни маҳаллийлаштириш режаси ҳам мавжуд. Умуман, Ўзбекистонда коронавирусга қарши вакциналар ишлаб чиқаришни йўлга қўйиш режалаштирилаётгани ҳақида 2020 йилнинг ноябрида маълум бўлганди.
Изоҳ (0)