O‘zbekiston 2023-yilga qadar koronavirusga qarshi vaksinadan keng foydalana olmaydi. Bu haqda The Economist Intelligence Unit tahlilchilariga tayanib, Repost xabar berdi.
Ta’kidlanishicha, O‘zbekiston bilan bir qatorda dunyoning yana 85 ta mamlakati vaksinadan eng oxirida foydalanadi.
Mutaxassislarning fikricha, birinchilardan bo‘lib Yevropa davlatlari, AQSh, Singapur, BAA va Gonkong vaksinani qo‘lga kiritadi. Ushbu mamlakatlarda vaksinadan bemalol foydalanish imkoniyati 2021-yil oxiriga qadar paydo bo‘ladi.
The Economist eksperlarining ta’kidlashicha, o‘rtacha daromadga ega ayrim davlatlar va daromadi past bo‘lgan aksariyat davlatlar vaksinalarning COVAX dasturi yordamida yetkazib berilishiga umid qilmoqda. Qayd etilishicha, mazkur tashabbus qashshoq mamlakatlar uchun 6 milliard doza vaksinani yetkazib berilishini ta’minlashi kerak.
O‘zbekiston vaksinani birinchi bo‘lib qo‘lga kiritadiganlar ro‘yxatida eng oxirgi o‘rindagi davlatlar qatorida joylashgan. Ushbu mamlakatlarning aksariyati Afrika qit’asida joylashgan.
Ma’lum qilinishicha, vaksinalarning dastlabki 2 milliard dozasi 2021-yilda, asosan, sog‘liqni saqlash xodimlariga tarqatiladi. Shu bilan birga, COVAX dozalari har bir mamlakat aholisining faqat 20 foizini qamrab oladi. COVAX’ning yetkazib berilishi sekin amalga oshishi mumkin, ayniqsa, ishlab chiqarish va yetkazib berishdagi uzilishlar sabab.
Tahlilchilar o‘z prognozlarini yetkazib berish shartnomalar, ishlab chiqarishning cheklanganligi, vaksinalarga ishonchsizlik, aholi soni va tibbiyot xodimlarining soniga asoslanib taqdim etgan.
Avvalroq GAVI (“Emlash va immunizatsiya bo‘yicha global alyans”) tashkiloti tomonidan O‘zbekiston COVAX’ga (Koronavirus infeksiyasiga qarshi emlash mexanizmi) a’zo davlatlar qatoriga kiritilganligi ma’lum qilingan edi.
Mavzuga doir: O‘zbekistonga Pfizer va BioNTech kompaniyalarining 100 ming doza vaksinasi keltiriladi
Ma’lumot uchun, Gamaleya instituti koronavirusga qarshi “Sputnik V” vaksinasini ishlab chiqargan. Hozirda vaksinadan favqulodda foydalanishni Rossiyadan tashqari Argentina ma’qullagan. Vaksina klinik sinovlari uchinchi bosqichining oraliq tahlil natijalari 92 foiz samaradorlikni tashkil etishini ko‘rsatdi. Dekabr oyi boshlarida vaksina ikkita komponentining maksimal narxi ma’lum qilindi.
Izoh (0)