Ijtimoiy tarmoqlarda Samarqand viloyati hokimi o‘zgargani va viloyatni boshqarish vazifasi vazir o‘rinbosariga topshirilgani to‘g‘risida xabar tarqaldi.
“Daryo” muxbiri bilan suhbatlashgan viloyat hokimligi axborot xizmati rahbari Manuchehr Mirzayev esa bu xabarni rad etdi.
“Unaqa emas. Vazirlar, vazir o‘rinbosarlari ko‘p kelib ketishadi. Shunga biror gap eshitishgan bo‘lsa, yozgandir. Bunaqa gap yo‘q. Hokim tez orada ishga chiqadi”, — dedi Manuchehr Mirzayev.
2021-yil 29-yanvar kuni soat 18:31 da viloyat hokimligining Telegram’dagi rasmiy sahifasida ham hokim Erkinjon Turdimovning tez orada ishga chiqishi ma’lum qilindi.
Eslatib o‘tamiz, avvalroq Samarqand hokimi Erkinjon Turdimov mehnat ta’tiliga besh kun oldin chiqib, ta’til muddati tugagandan keyin ham ikki kun dam olib, so‘ng ishga chiqishi ma’lum qilingandi. Hokimning matbuot kotibi, shuningdek, Turdimov 28-yanvar kuni viloyatga qaytayotganini qo‘shimcha qilgandi.
Prezident Shavkat Mirziyoyev raisligidagi 27-yanvar kungi yig‘ilishda davlat rahbari bir hafta ichida kadrlar masalasi bo‘yicha bir qarorga kelishini, ayrim amaldorlar aravani tortmayotganligini bayon qilib, yetarlicha ishlamayotgan vazir hamda hokim o‘z lavozimini tark etishini ta’kidlagandi.
Izoh (0)