Toshkent hokimining Ahmad Donish va Amir Temur ko‘chalari kesishmasida 65 ta tadbirkorga tegishli bino va inshootlar joylashgan 6 gektar yer uchastkasini davlat va jamiyat ehtiyoji uchun olish to‘g‘risidagi qarori bekor qilindi, deya xabar bermoqda Oliy sud.
Ma’lum qilinishicha, Toshkent tumanlararo ma’muriy sudida so‘nggi kunlarda ko‘pchilikning e’tiborini tortib kelgan, ommaviy axborot vositalari va ijtimoiy tarmoqlarida muhokamalarga sabab bo‘lgan Yunusobod tumani Ahmad Donish va Amir Temur ko‘chalari kesishmasida 65 ta tadbirkorga tegishli bino va inshootlar joylashgan 6 gektar yer uchastkasini davlat va jamiyat ehtiyoji uchun olish to‘g‘risidagi hokim qarorlarini haqiqiy emas deb topish haqidagi ma’muriy ishni mazmunan ko‘rib chiqish bo‘yicha sud jarayoni 2021-yil 27-yanvar kuni yakunlandi.
Ushbu ish sudya D.Toshev tomonidan ko‘rib chiqilib, sudning hal qiluv qaroriga ko‘ra, arizachi “Uy ro‘zg‘or mollari” MChJ, “Nur sexri oshiyoni” MChJ, “Zar-ziynat biznes” MChJ, “Saida-baroka” XK, “Glorius justice” MChJ, S. Rososhanskaya va “Emisun market” XKning talablari to‘liq qanoatlantirildi.
Toshkent shahar hokimining 2018-yil 27-noyabrdagi “Yer maydonlarida obodonlashtirish va buzish ishlarini olib borish haqida”gi 1667-sonli, 2019-yil 31-dekabrdagi “Urban developers” MChJ shaklidagi qo‘shma korxonasiga yer maydonini ajratib berish haqidagi 1879-sonli va Yunusobod tuman hokimining 2018-yil 18-dekabrdagi “Toshkent shahar hokimining 2018-yil 27-noyabrdagi qarori ijrosi haqida”gi 2102-sonli qarorlari haqiqiy emas deb topildi.
Hal qiluv qarori ustidan qaror chiqarilgan kundan e’tiboran 30 kun ichida Toshkent shahar ma’muriy sudiga shu sud orqali apellyatsiya tartibida shikoyat berilishi yoki protest keltirilishi mumkinligi ma’lum qilingan.
Avvalroq Yunusoboddagi “Universam” ko‘prigining bir tomoni ta’mirlash ishlarini tezlashtirish uchun to‘liq yopilgani haqida xabar berilgandi.
Izoh (0)