Mehnat ta’tiliga ko‘rsatilgan muddatidan 5 kun oldin chiqqan Erkinjon Turdimov ta’til tugagandan so‘ng ham ikki kun dam olib keyin, ishga chiqishi ma’lum bo‘ldi

Samarqand viloyati hokimi Erkinjon Turdimov sog‘lig‘ini tiklash maqsadida qisqa muddatli davolanish ta’tiliga chiqqanligi haqida xabar berilgandi. Keyinchalik, hokim 17-yanvar kunidan boshlab 10 kunlik muddatga mehnat ta’tiliga chiqishi lozimligi ma‘lum bo‘ldi.

Samarqand viloyat hokimligi axborot xizmati rahbari Manuchehr Mirzayevning ma’lum qilishicha, Erkinjon Turdimov bugun, 28-yanvar kuni Samarqandga qaytadi.

“Viloyat hokimi ertaga yo‘lga chiqadi. 30-yanvar, shanba kuni yoki 1-fevral dushanba kuni ishga chiqishini aytgan”, – dedi hokim matbuot kotibi Manuchehr Mirzayev “Daryo” muxbiri bilan 27-yanvar kundagi suhbatida.

Eslatib o‘tamiz, Prezident Shavkat Mirziyoyev 4-yanvardan qisqa muddatli mehnat ta’tiliga chiqqan edi. 11-yanvar kuni Prezident ta’tildan qaytib, Jizzaxdagi harbiy qismga tashrif buyurgan.

2021-yil 17-yanvar kuni Qoraqalpog‘iston Vazirlar Kengashi raisi Qahramon Sariyev, Toshkent shahri hokimi Jahongir Ortiqxo‘jayev, Jizzax viloyati hokimi Ergash Soliyev, Samarqand hokimi Erkinjon Turdimov, Sirdaryo hokimi G‘ofur Mirzayev, Surxondaryo viloyati rahbari To‘ra Bobolov va Toshkent viloyati hokimi Rustam Xolmatovlar 10 kunlik muddatga mehnat ta’tiliga chiqdi. Qoraqalpog‘iston rahbari va 6 viloyat hokimi bugun, 28-yanvardan ta’tilga chiqadi.