O‘zbekistonda yoshlar muammolarini tizimli hal etish maqsadida, Respublika ishchi guruhi joylarda o‘g‘il-qizlarning takliflarini “mahallabay” o‘rganmoqda. Hozirga qadar poytaxt va 6 ta viloyatda 50 mingga yaqin yoshlar bilan muloqotlar tashkil etildi. Bu haqda 27-yanvar kuni Prezident Shavkat Mirziyoyev raisligida o‘tkazilgan videoselektor yig‘ilishida so‘z yuritildi, deya xabar bermoqda “Daryo” muxbiri.
“Bildirilgan taklif va istaklar asosida tuman va shaharlar kesimida yoshlar dasturlari tasdiqlandi. Ushbu dasturlarning ijrosi hamda yoshlarning ijtimoiy muammolarini tizimli o‘rganish va muvofiqlashtirish vazifasi Davlat xavfsizlik xizmatiga yuklatildi”, — dedi Prezident.
Davlat rahbarining ta’kidlashicha, vazifaning muhimligi inobatga olinib, DXX yoshlar muammolari bo‘yicha rejalarning joylarda amalga oshirilishini nazorat qilib, mazkur rejalar bajarilishiga ko‘maklashadi.
Avvalroq Prezident Toshkent shahrida 77 mingta vakant ish o‘rinlari mavjudligi, shundan 45 mingtasiga oliy ma’lumot talab etilmasligini, tuman sektor rahbarlari haftaning ikki kunini faqat yoshlar muammolarini hal etishga ajratishini hamda O‘zbekistondagi 18—30 yoshlilar orasidagi rasmiy ishsizlar sonini ma’lum qilgandi.
Izoh (0)