O‘zbekistonning barcha viloyatlarida “Yoshlar sanoat va tadbirkorlik zonasi” tashkil etiladi va bu masalaga Investitsiya va tashqi savdo vaziri Sardor Umurzoqov mas’ul bo‘ladi. Bu haqda 27-yanvar kuni Prezident Shavkat Mirziyoyev raisligida o‘tkazilgan videoselektor yig‘ilishida so‘z yuritildi, deya xabar bermoqda “Daryo” muxbiri.
Davlat rahbarining ta’kidlashicha, Sardor Umurzoqov viloyat hokimlari bilan birga ushbu sanoat zonalarini yoshlarga mos, zarur infratuzilmaga ega bo‘lgan qulay joylarda tashkil etish dasturini ishlab chiqadi.
“Misol uchun, Qarshi shahrida 3 ming nafar ishsiz yoshlar mavjud. Shahardagi 5,5 gektar maydonda tashkil etilgan ‘Yoshlar sanoat va tadbirkorlik zonasi’da 140 ta loyiha doirasida 1 ming nafar yoshlar ish bilan ta’minlanadi.
Shuningdek, 2021-yil birinchi choragida ishsiz yoshlarning 350 nafarini kredit berish orqali tadbirkorlikka jalb qilish, 360 nafarini tadbirkorlarga biriktirish, 150 nafarini kasbga-hunarga o‘qitish, tashkillashtirilgan migratsiya orqali 118 nafarini xorijga yuborish orqali qariyb 1 ming nafarining bandligini ta’minlash imkoni mavjud”, — dedi Prezident.
Yig‘ilishda ma’lum qilinishicha, Qashqadaryo viloyatida 18—30 yoshgacha bo‘lganlar 645 ming nafar, shundan ishsizlar soni 27 ming nafarni tashkil etadi. Viloyatda hisobga olinmagan ishsiz yoshlar kamida 150 ming nafardan iborat.
“Viloyatda 2 mingdan ziyod ijtimoiy muammosi mavjud, 4 mingdan ortiq nogironligi bo‘lganlar, 887 nafar jinoiy jazo o‘tayotgan yoshlar bor”, — dedi Shavkat Mirziyoyev.
Mavzuga doir:
- “2021-yilda 500 ming nafar o‘quvchi va 100 ming nafar talabani ichki turizmga jalb qilamiz” – Shavkat Mirziyoyev
- “Poytaxtdagi 85 ta talabalar uyi atigi 13 foiz yoshlarni turar joy bilan ta’minlash imkoniyatiga ega” – Shavkat Mirziyoyev
- Shavkat Mirziyoyev: “Toshkent shahrida 77 mingta vakant ish o‘rinlari mavjud, shundan 45 mingtasiga oliy ma’lumot talab etilmaydi”
Izoh (0)