O‘zbekistonda viloyat hokimlari bosqichma-bosqich qisqa muddatli ta’tilga chiqmoqda

O‘zbekistonda viloyat hokimlari Prezident administratsiyasi tomonidan tasdiqlangan reja asosida bosqichma-bosqich qisqa muddatli ta’tilga chiqmoqda, deb xabar beradi “Gazeta.uz”.

9-yanvar kuni Samarqand viloyati hokimi Erkinjon Turdimov sog‘lig‘ini tiklash maqsadida qisqa muddatli ta’tilga chiqqandi.

17-yanvar kuni Sirdaryo viloyati hokimi G‘ofurjon Mirzayev ham tibbiy ko‘rikdan o‘tish va davolanish uchun qisqa muddatli ta’tilga chiqdi.

Sirdaryo viloyati hokimligining “Gazeta.uz”ga ma’lum qilishicha, ta’til hokimning sog‘lig‘i bilan bog‘liq emas. G‘ofurjon Mirzayev 10 kun davomida profilaktik tibbiy ko‘rikdan o‘tadi.

“Prezident administratsiyasi tomonidan tasdiqlangan rejaga muvofiq, 10 kun davomida 5 nafar hokim, keyingi 10 kunda yana 5 nafar hokim, shuningdek, sektor rahbarlari, hokim o‘rinbosarlari bosqichma-bosqich profilaktik tibbiy ko‘rikdan o‘tadi”, — deyiladi xabarda.

Prezident Shavkat Mirziyoyev ham 4-yanvardan qisqa muddatli mehnat ta’tiliga chiqqan, 11-yanvar kuni davlat rahbari ta’tildan qaytgandi.

Eslatib o‘tamiz, 7-yanvar kuni Qashqadaryo hokimi Zoir Mirzayev boshchiligidagi tuman va shahar hokimlari, shuningdek, viloyat hokimining barcha o‘rinbosarlari birlamchi tibbiy ko‘rikdan o‘tgandi. Tibbiy ko‘rik viloyat ko‘p tarmoqli tibbiyot poliklinikasida amalga oshirilgan.

Ma’lumot uchun, O‘zbekistondagi amaldagi qonunchilikka ko‘ra viloyat hokimlari hukumat qoshidagi tibbiyot bosh boshqarmasi ro‘yxatida turadi. Ularga zarur holatlarda tibbiy diagnostika qilish, davolash, umuman olganda, ularning salomatligini muhofaza qilish mazkur boshqarma zimmasida.