Samarqand shahrida jamoat transporti va yo‘nalishsiz taksi haydovchilari o‘rtasida janjal kelib chiqdi, deya xabar berdi “Daryo” muxbiri.
Ta’kidlanishicha, voqea 2021-yilning 22-yanvar kuni soat, taxminan, 09:30 da yo‘lovchi talashish natijasida kelib chiqqan.
Samarqand viloyat IIB axborot xizmatining aniqlik kiritishicha, holat yuzasidan Samarqand shahri bo‘yicha IIO FMB 6-sonli IIB xodimlari tomonidan tergovga qadar surishtiruv harakatlari olib borilgan va huquqbuzarlikni Oqdaryo tumanida yashovchi 1996-yilda tug‘ilgan K.O. hamda K.X., 1979-yilda tug‘ilgan A.A., Oqdaryo tumanida tug‘ilgan 1996-yilda tug‘ilgan R.T., 1984-yilda tug‘ilgan B.Z. sodir etgani aniqlangan.
Ma’lum bo‘lishicha, Samarqand shahrining Dahbed va Ro‘dakiy ko‘chalari kesishgan chorraha yaqinida kirakashlik faoliyati bilan shug‘ullanuvchi ushbu shaxslar yo‘lovchi talashgan va janjal chiqarib, jamoat tartibini buzgan.
Ushbu huquqbuzarlikni sodir qilgan barcha shaxslarga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik)ga asosan ma’muriy bayonnoma rasmiylashtirilib, to‘plangan hujjatlar qonuniy qaror qabul qilish uchun Jinoyat ishlari bo‘yicha Samarqand shahar sudiga yuborilgan.
Bundan tashqari, avtobusga belgilangan me’yordan ortiq yo‘lovchi olib harakatlangan haydovchiga nisbatan ma’muriy tartibda chora ko‘rilib, viloyat Transport boshqarmasi xodimlari bilan birgalikda profilaktik suhbat o‘tkazilgan.
Izoh (0)