Jazoni ijro etish tizimidagi koloniyalarning sig‘imiga nisbatan saqlanadigan joylarning 44 foizi bo‘sh. Bu haqda AOKA da bo‘lib o‘tgan matbuot anjumanida Jazoni ijro etish bosh boshqarmasi Tarbiyaviy va ijtimoiy psixologik ishlarni tashkil etish boshqarmasi boshlig‘i Jamshid Sultonov ma’lum qildi.
Ta’kidlanishicha, bugungi kunda 43 ta jazoni ijro etish muassasasi va 11 ta tergov hibsxonasi mavjud. Ularning 18 tasi yopiq turdagi koloniya va 25 tasi manzil-koloniya hisoblanadi.
“Jazoni ijro etish tizimidagi koloniyalarning sig‘imiga nisbatan saqlanayotgan shaxslar 56,4 foizni, bo‘sh o‘rinlar 43,6 foizni tashkil qilmoqda. So‘nggi to‘rt yilda jazo muddatini o‘tayotgan shaxslarning huquq va qonuniy manfaatlari doirasini yanada kengaytirishga qaratilgan 3 ta qonun, 5 ta Prezident qarori, 8 ta hukumat qarori va farmoyishlari, 14 ta boshqa normativ-huquqiy hujjatlar qabul qilindi”, – dedi Jamshid Sultonov.
Tadbirda aytilishicha, mahkumlarga bir qancha sharoitlar yaratilgan. Ular uchun:
- ijtimoiy xavfi katta bo‘lmagan hamda uncha og‘ir bo‘lmagan jinoyat sodir etgan shaxslarga ilk marotaba saylash huquqi berildi;
- BMT Bosh assambleyasi tomonidan qabul qilingan “Mahkumlar bilan muomala qilishning minimal standartlari qoidalari” qonunchiligimizga implementatsiya qilindi;
- yopiq turdagi muassasalarida saqlanayotgan shaxslarning yaqin qarindoshlari bilan telefon so‘zlashuvlari, uchrashuvlari va jo‘natma qabul qilishlari soni qariyb ikki barobarga ko‘paytirildi;
- ozodlikdan mahrum etishga hukm qilingan shaxslarning ruhiy holati buzilgan vaqtda sodir etgan tartibbuzarligi uchun intizomiy jazo choralari qo‘llanilmasligi kafolatlandi;
- shoshilinch tibbiy yordamga muhtoj shaxslarni Sog‘liqni saqlash vazirligining hududiy muassasalariga joylashtirish qonunan mustahkamlandi;
- manzil-koloniyalarda jazo muddatini o‘tayotgan mahkumlarga pensiya va ijtimoiy sug‘urta to‘lash huquqi berildi;
- mahkumlarning jazo muddatini o‘tash davomida shaxsiy xavfsizligini ta’minlashga qaratilgan choralar kengaytirildi;
- adolatli mezonlar asosida mahkumlarga rag‘batlantirish choralarini qo‘llashni alohida tartibi belgilandi. Bu borada jazoni ijro etish muassasalarida jamoatchilik vakillari, Ombudsman, xalq deputatlari hududiy kengashlaridan iborat maxsus komissiyalar faoliyati yo‘lga qo‘yildi.
- mahkumlarni tarbiyalashda ularning ota-onalari roli kuchaytirilib, voyaga yetmagan mahkumlarning ota-onalari bilan uchrashuvlariga nisbatan cheklovlar olib tashlandi;
- mahkuma ayollarning bolalar uyida tarbiyalanayotgan voyaga yetmagan farzandlari bilan uchrashuvlarining alohida tartibi joriy etildi.
Ma’lumot uchun, O‘zbekistonda bugungi kunda 22 mingdan ortiq kishi jazoni ijro etish muassasalarida jazo muddatini o‘tamoqda. Ulardan 7 mingdan ortig‘i manzil koloniyalarda, 14 mingdan ortig‘i yopiq turdagi koloniyalarda jazo muddatini o‘tayotgani aytilgan edi.
Izoh (0)