Savdo-sanoat palatasi va Yoshlar ishlari agentligi rahbarlari viloyat hokimlari bilan birga fevral oyidan boshlab, “yoshlar daftari”ga kirgan 100 ming nafar yoshlarni “1+1” loyihasi doirasida haftalik o‘quv kurslarida tashabbuskor tadbirkorlar ishtirokida o‘qitishni tashkil etadi. Bu haqda 27-yanvarda Prezident Shavkat Mirziyoyev raisligida o‘tkazilgan videoselektor yig‘ilishida so‘z yuritildi, deya xabar bermoqda “Daryo” muxbiri.
Davlat rahbarining ta’kidlashicha, Andijon, Qashqadaryo, Samarqand, Farg‘ona, Toshkent viloyatida – 10 ming nafardan, Qoraqalpog‘iston, Buxoro, Namangan va Surxondaryo, Xorazmda – 7 mingdan, Jizzax, Navoiy, Sirdaryo va Toshkent shahrida – 4 ming nafardan “yoshlar daftari”ga kiritilgan yigit-qizlar o‘qitiladi.
“O‘quv kursini tamomlaganlarga sertifikat berilib, ularga ‘Mikrokreditbank’, ‘Xalq banki’ va ‘Agrobank’ orqali imtiyozli kreditlar ajratiladi. Buning uchun har bir viloyatga 100 milliard so‘mdan resurs beriladi. Yoshlar tadbirkorligi bo‘yicha kreditlarni muvofiqlashtirishga ‘Mikrokreditbank’ mas’ul bo‘ladi.
‘Mikrokreditbank’ raisi bankka yoshlarning istiqbolli loyihalarini jalb etishga ko‘maklashadigan, tadbirkorlik qobiliyati bor yoshlarni rag‘batlantirish amaliyotini joriy qilish tashabbusi bilan chiqdi. Ushbu tashabbus doirasida bank har bir tumandan 10 nafar bunday faol yoshlarni hamkorlikka jalb qilib, ishni “mahallabay” tashkil etmoqchi. Bu tizim orqali 40 ming nafar yoshlarning tadbirkorlik loyihalarini samarali amalga oshirish mumkin. Mazkur taklif menga juda ma’qul”, – dedi Shavkat Mirziyoyev.
Prezidentning qo‘shimcha qilishicha, “Har bir tadbirkor – yoshlarga madadkor” tashabbusi doirasida yoshlarni korxona va hunarmandlarga biriktirish, shuningdek, o‘zini o‘zi band qilish tizimi orqali 100 mingdan ortiq kishining bandligini ta’minlash lozim.
Avvalroq Shavkat Mirziyoyev Toshkent shahrida 77 mingta vakant ish o‘rinlaridan 45 mingtasiga oliy ma’lumot talab etilmasligini, “Vatanparvar” tashkiloti Mudofaa vazirligi tizimiga o‘tkazilishini hamda O‘zbekistondagi 18-30 yoshlilar orasidagi rasmiy ishsizlar sonini ma’lum qilgandi.
Mavzuga doir:
Izoh (0)