Bugungi kunda Toshkent shahrida 479 ming nafar yoshlardan 26 ming nafarining bandligi ta’minlanmagan. Bu haqda 27-yanvar kuni Prezident Shavkat Mirziyoyev raisligida o‘tkazilgan videoselektor yig‘ilishida so‘z yuritildi, deya xabar bermoqda “Daryo” muxbiri.
“‘Yoshlar: 1+1’ dasturi doirasida o‘g‘il-qizlarimizda tadbirkorlik ko‘nikmalarini shakllantirishimiz zarur. Bu masalani poytaxt misolida ko‘radigan bo‘lsak, Toshkent shahrida 479 ming nafar yoshlardan (18-30 yosh) 26 ming nafarining bandligi ta’minlanmagan. Shundan, 11 ming nafarini o‘tgan yilgi maktab bitiruvchilari tashkil qiladi.
Ayni paytda, Toshkent shahrida 77 mingta vakant ish o‘rinlari mavjud bo‘lib, shundan 45 mingtasiga oliy ma’lumot talab etilmaydi. Eng qizig‘i, shu paytgacha ishsiz aholi va bo‘sh ish o‘rinlari o‘zaro uyg‘unlikda ko‘rib chiqilmagan.
Misol uchun, Uchtepa tumanida 3 ming nafar ishsiz yoshlarni kasbga o‘qitish orqali, malaka toifasini berib, davlat idoralaridagi vakant o‘rinlarga joylashtirish mumkin. Tumandagi “Birlik” mahallasida 103 nafar yoshlar ishsiz. O‘rganishlarda ushbu mahalladagi 3 nafar hunarmand 2-3 nafardan ishsiz yoshlarni shogirdlikka olishini, 50 nafar tadbirkorlar esa 1 nafardan yoshlarni ishga qabul qilish istagini bildirgan.
Birinchi chorakda, 10 nafar yoshlarni kredit ajratish va subsidiya berish orqali tadbirkorlikka jalb etish mumkin. Tumanda 5 mingdan ziyod tadbirkorlik subyektlari, jumladan, 600 dan ortiq sanoat korxonasi mavjud. Yil yakuniga qadar 91 ta investitsiya loyihasi doirasida 4 mingdan ziyod yangi ish o‘rinlari yaratilishi inobatga olinsa, Uchtepada ishsiz yoshlar umuman bo‘lmasligi kerak. Aksincha, boshqa viloyatdan kelgan ishsiz yoshlarni ham, tumanda band qilish imkoniyatlarimiz mavjud”, – dedi davlat rahbari.
Avvalroq Prezident Vatanparvar” tashkiloti Mudofaa vazirligi tizimiga o‘tkazilishini, O‘zbekistondagi 18-30 yoshlilar orasidagi rasmiy ishsizlar sonini hamda bosh vazir va administratsiya rahbaridan ruxsat so‘ramay majlis o‘tkazgan amaldor ishdan olinishini ma’lum qilgandi.
Izoh (0)