Toshkent shahar Sergeli tumanida 2020-yil 27-noyabr kuni noma’lum shaxs bankomatlardan biriga o‘g‘rilikka tushib, uning ichida bo‘lgan 87 million so‘m pulni o‘g‘irlab ketdi. Bu haqda “Zamon.uz” ma’lum qildi.
Ma’lum qilinishicha, yaqinda to‘yi bo‘lgan yigit Qo‘yliq-5 dahasiga o‘rnatilgan bankomatni ochish uchun qora niqob taqib, hech qanday iz qoldirmay, apparat ichida bo‘lgan 87 million so‘mdan ortiq pulni o‘g‘irlagan. Oradan 1 oy o‘tib yigit Mirobod va Yakkasaroy tumanlaridagi bankomatlardan biriga o‘g‘irlikka tushgan.
Navbatdagi bankomatni tunash maqsadida u 16-yanvar kuni Qushbegi ko‘chasiga keladi. U yerda joylashgan apparatni bolgarka yordamida ochishni boshlaydi. Bankomatga yaqin joyda joylashgan non sexi ishchilaridan biri yarim tundagi baland ovozni eshitib keladi va ish joyiga qaytib, IIBga qo‘ng‘iroq qiladi.
Toshkent shahar IIBB ma’lumotlariga ko‘ra, Yakkasaroy tumani Qushbegi mavzesida joylashgan bankomatlarning birida noma’lum shaxs tomonidan o‘g‘irlik jinoyati sodir etilgani to‘g‘risida xabar kelib tushgan. Surishtiruvlar natijasida bu jinoyatni 27 yoshli fuqaro sodir etgani aniqlanib, u ushlangan. Surishtiruv harakatlari davomida har uchala jinoyatni sodir etgan shaxs ushbu yigit ekanligi ma’lum bo‘lgan.
“2020-yil 12-dekabr kuni uylanish maqsadida to‘ydan oldin 76 million so‘m qarz olgandim. O‘sha pulni yig‘ib berolmaganimdan keyin boshqa ilojini topolmasdan, bankomatga o‘g‘rilikka tushdim”, — deydi jinoyatni sodir etgan shaxs.
Hozirda ushbu fuqaroga nisbatan Jinoyat kodeksining 169-moddasi 4-qismi a bandi (juda ko‘p miqdorda moddiy zarar yetkazish) bilan jinoyat ishi qo‘zg‘atilib, ehtiyot chorasi sifatida qamoqqa olingan.
Avvalroq Jizzaxda bankomatdagi pullarni o‘g‘irlamoqchi bo‘lgan yigit qo‘lga olingani, Toshkentda ikki hafta ichida 7 ta to‘lov infokioski o‘g‘irlab ketilgani hamda O‘zbekistonda bankomatlar soni 10 mingtadan oshgani haqida xabar berilgandi.
Izoh (0)