Xitoyda Huawei DriveOne platformasida yaratilgan dunyodagi birinchi seriyali model — Seres SF5 Free Expedition Edition krossoveri taqdim etildi, deb xabar beradi IXBT.
Yangi model elektromotorlarning asosiy komponentlarini o‘zida mujassamlashtirgan: dvigatel boshqaruvi bloki, reduktor, o‘zgarmas tokni hosil qilgich, bort quvvatlantirish qurilmasi.
Huawei’ning hisoblashicha, DriveOne — nafaqat elektromobillarni ishlab chiqarish jarayonini soddalashtirishga, balki ularning arzonroq bo‘lishini ta’minlashga xizmat qiladigan universal yechim hisoblanadi. Seres SF5 Free Expedition Edition asosini deyarli oddiy benzinli avtomobil tashkil etgani sabab DriveONE avtomobil komponovkasiga u qadar talabchan emas. Platformaning bu kabi jihatlari o‘z lineykasini elektromotorli modellarga o‘zgartirish haqida bosh qotirayotgan boshqa kompaniyalarni ham qiziqtirishi kerak.
O‘lchami jihatida Seres SF5 Free Expedition Edition modeli Seres SF5 deb ataluvchi oddiy benzinli versiyadan farq qilmaydi: g‘ildiraklar bazasi — 2875 millimetr, uzunligi, eni va balandligi mos ravishda 4700, 1930 va 1625 millimetr. Mashina quvvati 350 ot kuchiga teng ikkita elektrodvigatel yordamida harakatga keladi. NEDS standartlariga ko‘ra, bir marta quvvatlanish orqali avtomobil 1000 kilometr masofa bosishi mumkin.
Seres SF5 Free Expedition Edition kameralar va ultratovush datchiklar bilan jihozlangan, hatto radar ham bor, biroq L2+ darajasidagi avtonom boshqarish tizimini ilg‘or deb bo‘lmaydi. Umuman olganda, yangi model u qadar qimmat emas — 40 ming dollar. Savdolar qaysi sanadan boshlanishiga aniqlik kiritilmagan.
Avvalroq Xitoyda bir marta quvvatlanish orqali 708 km yo‘l bosishga qodir Tesla “qotili” taqdim etilgani to‘g‘risida xabar berilgandi.
Izoh (0)