Moskvada 1971-yilda ishlab chiqilganidan buyon 12,4 ming kilometr yo‘l bosgan “GAZ-69” sotuvga qo‘yildi. Ideal holatda saqlangan armiya yo‘ltanlamasini 1,5 million rublga (20 ming dollar) xarid qilish mumkin, deb xabar beradi Motor.
“GAZ-69” Ikkinchi jahon urushidan keyingi davrda armiyada, shuningdek, ijtimoiy va qishloq xo‘jaligi ehtiyojlarida keng foydalanilgan yo‘ltanlamas hisoblanadi. 1952-yildan 1973-yilga qadar Gorkiy va Ulyanov avtomobil zavodlaridan 600 mingdan ortiq shu turdagi modellardan ishlab chiqarilgan. 20 yillik ishlab chiqarish davomida “GAZ-69” dunyoning 56 mamlakatiga eksport qilingan. Keyinchalik “GAZ-69” o‘rnini “UAZ-469” egallagan bo‘lib, hozirda u “Xanter” nomi ostida ishlab chiqarilmoqda.
Sotuvga qo‘yilgan yo‘ltanlamas yechiladigan tentli klassik kuzov komponovkasiga ega. Sotuvchining so‘zlariga ko‘ra, afsonaviy “GAZ-69” hech qachon restavratsiya qilinmagan, shu sabab avtomobil zavoddagi barcha original detallarini saqlab qolgan va ular soz holatda. E’lon qilingan suratlarda mashina rostdan ham yaxshi holatda ekanini ko‘rish mumkin, biroq interyer suratlari taqdim etilmagan.
To‘liq uzatmali “GAZ-69” 55 ot kuchiga ega 2,0 litrli benzin dvigatel bilan jihozlangan bo‘lib, u mexanik transmissiya yordamida boshqariladi. Sotuvchi mazkur mashinani 1,5 million rublga sotishga tayyor. Rossiyada bu pulga yangi “UAZ Patriot” xarid qilish mumkin.
Avvalroq Italiyada deyarli yurmagan “Moskvich” sotuvga qo‘yilgani va u yangi Toyota Corolla narxida baholanayotgani to‘g‘risida xabar berilgandi.
Izoh (0)