Canepa auksioni orqali 1980-yilda ishlab chiqarilgan va hozirga qadar 36,6 ming kilometr yo‘l bosgan noyob BMW M1 superkari sotuvga qo‘yiladi. 456 nusxada yaratilgan o‘rta motorli model 20 yil garajda harakatsiz turgan, deb yozadi Motor.
BMW M1 Bavariya konsernining eng noyob modellaridan biri hisoblanadi. Avvaliga nemis mutaxassislari Lamborghini bilan hamkorlikda FIA poygalari uchun Group 4 klassiga kiradigan takomillashtirilgan avtomobilni yaratishni rejalashtirgan. Biroq italiyaliklar tomonidan kutilmaganda berilgan rad javobi sabab BMW sportkarning 456 nusxasini ishlab chiqara olgan xolos.
Sotuvga qo‘yilgan ikki eshikli model 1980-yilda ishlab chiqarilgan. Sportkarning birinchi egasi uni 10 yil davomida Kaliforniyada haydagan. Bu vaqt davomida kupe 36,6 ming kilometr yo‘l bosgan. Shundan keyin noma’lum sababga ko‘ra noyob sportkar keyingi 20 yil davomida garajda turgan. Ayni vaqtda kolleksiya avtomobili qayta tiklangan va sotuvga to‘liq tayyor.
Avvaliga sportkar ko‘k rangda ishlab chiqarilgan. Biroq uning birinchi egasining talabiga ko‘ra, kuzov oq rangga bo‘yalgan. Qisman amalga oshirilgan restavratsiyadan so‘ng, mashina saloni xuddi yangidek ko‘rinish olgan. BMW M1 277 ot kuchiga (330 Nm) ega 3,5 litrli V6 yordamida harakatga keladi. Agregat besh pog‘onali mexanik uzatmalar qutisi yordamida boshqariladi. Superkar soatiga 100 kilometr tezlikka 5,6 soniyada erishadi, maksimal tezligi — 260 km/soat.
Avvalroq “Forsaj” yulduziga tegishli bo‘lgan o‘rta motorli BMW M1 auksionga qo‘yilgani to‘g‘risida xabar berilgandi.
Mavzuga doir: Boney M guruhi asoschisiga tegishli noyob BMW M1 auksion orqali sotuvga qo‘yiladi (foto)
Izoh (0)