Хитойда Huawei DriveOne платформасида яратилган дунёдаги биринчи серияли модель — Seres SF5 Free Expedition Edition кроссовери тақдим этилди, деб хабар беради IXBT.
Янги модель электромоторларнинг асосий компонентларини ўзида мужассамлаштирган: двигатель бошқаруви блоки, редуктор, ўзгармас токни ҳосил қилгич, борт қувватлантириш қурилмаси.
Huawei’нинг ҳисоблашича, DriveOne — нафақат электромобилларни ишлаб чиқариш жараёнини соддалаштиришга, балки уларнинг арзонроқ бўлишини таъминлашга хизмат қиладиган универсал ечим ҳисобланади. Seres SF5 Free Expedition Edition асосини деярли оддий бензинли автомобиль ташкил этгани сабаб DriveONE автомобиль компоновкасига у қадар талабчан эмас. Платформанинг бу каби жиҳатлари ўз линейкасини электромоторли моделларга ўзгартириш ҳақида бош қотираётган бошқа компанияларни ҳам қизиқтириши керак.
Ўлчами жиҳатида Seres SF5 Free Expedition Edition модели Seres SF5 деб аталувчи оддий бензинли версиядан фарқ қилмайди: ғилдираклар базаси — 2875 миллиметр, узунлиги, эни ва баландлиги мос равишда 4700, 1930 ва 1625 миллиметр. Машина қуввати 350 от кучига тенг иккита электродвигатель ёрдамида ҳаракатга келади. NEDS стандартларига кўра, бир марта қувватланиш орқали автомобиль 1000 километр масофа босиши мумкин.
Seres SF5 Free Expedition Edition камералар ва ультратовуш датчиклар билан жиҳозланган, ҳатто радар ҳам бор, бироқ L2+ даражасидаги автоном бошқариш тизимини илғор деб бўлмайди. Умуман олганда, янги модель у қадар қиммат эмас — 40 минг доллар. Савдолар қайси санадан бошланишига аниқлик киритилмаган.
Аввалроқ Хитойда бир марта қувватланиш орқали 708 км йўл босишга қодир Tesla «қотили» тақдим этилгани тўғрисида хабар берилганди.
Изоҳ (0)