Ba’zan biz shunchaki deb qabul qiladigan kasalliklar oddiy ko‘ringani bilan ko‘plab jiddiy sabablarni olib kelishi, uning ortida xavfli kasallik rivojlanayotgan bo‘lishi ham mumkin. Lifehacker saratonning har doim ham e’tibor berilavermaydigan alomatlari bilan tanishtiradi.
1. Ko‘krak terisi rangining o‘zgarishi
Sut bezlarining qattiqlashishi har doim ham saraton alomati bo‘lavermaydi. Ammo o‘zingizda quyidagi simptomlarni sezsangiz, shifokorga murojaat qiling:
- terining tortilib qolishi yoki qipiqlanishi;
- ko‘krak uchining ichkariga tortilib qolishi;
- ko‘krak uchidan ajralmalar chiqishi;
- ko‘krak yoki uning bir qismining qizarishi, toshmalar toshishi.
2. Qorinning dam bo‘lishi
Agar ushbu alomat uzoq vaqt davom etsa va qon ketishi hamda vazn yo‘qotish bilan birgalikda kechsa, albatta, shifokor bilan maslahatlashing. Qorinning doimiy dam bo‘lishi yo‘g‘on ichak, ko‘krak, oshqozon-ichak tizimi, oshqozonosti bezi yoki bachadon saratonlarining belgisi bo‘lishi mumkin.
Boshqa alomatlarni ham hisobga olgan holda ginekolog ko‘rigi, qon tahlili, mammografiya kolonoskopiya, kompyuter tomografiyasi va UTT (ultratovush tekshiruvi) kabi qator tekshiruvlar amalga oshiriladi.
3. Hayz kunlaridan boshqa kunlarda qon ketish
Hayz kunlaridan boshqa kunlarda qon ketishi turli sabablarga ko‘ra yuz berishi mumkin. Shunga qaramay endometriy saratoni uchun tekshiruvdan o‘tish zarur. Endometriy — bachadon ichidagi shilliq qavat.
Agar qon ketishi menopauzadan keyin kuzatilayotgan bo‘lsa, zudlik bilan shifokorga murojaat qiling.
4. Xollar
Agar xollaringiz rangi, hajmi o‘zgarayotgan bo‘lsa yoki sizda yangi xollar paydo bo‘layotgan bo‘lsa, shifokor bilan maslahatlashishni unutmang. Bu saraton kasalligining umumiy belgisidir.
5. Siydik va ahlatdagi qon
Sizdagi ushbu alomat bir necha kun kuzatilsa, shifokorga murojaat qiling. Bu yo‘g‘on ichak saratoniga olib kelish mumkin. Siydikdagi qon esa qovuq va buyraklar saratonining ilk alomatidir. Biroq vahima qilishga ham shoshilmang, bu qovuq shamollashi— sistit bo‘lishi ham mumkin.
6. Limfa tugunlaridagi o‘zgarishlar
Limfa tugunlari yumaloq yoki oval shaklida bo‘ladi. Ular orqali turli organlardan keladigan limfa bezlari o‘tadi. Odatda, ular yuqumli kasalliklar paytida kattalashadi. Biroq ular ayrim saraton turlari, xususan, leykemiya va limfomada shishib, sezgir bo‘lib qoladi. Agarda shish va o‘sma bir oydan keyin ham o‘tib ketmasa shifokorga murojaat qiling.
7. Yutinish qiyin bo‘lib qolsa
Bu holat kamdan kam kuzatilsa, buning xavfli joyi yo‘q. Lekin tez-tez va qayt qilish, vazn yo‘qotish bilan birga kuzatilsa, tomoq, qizilo‘ngach va oshqozon saratoni uchun tekshiruvdan o‘tish zarur.
8. Vazn yo‘qotish
Ko‘plab ayollar ortiqcha vazndan xalos bo‘lishni orzu qiladi. Ammo siz parhez va mashqlarsiz ham vazningizni yo‘qotayotgan bo‘lsangiz, bu muammo. Ayniqsa, yo‘qotilgan vazn besh kilogramdan oshib ketsa.
Ko‘p hollarda bu holat saraton bilan bog‘liq emas. Uning sababi stress yoki qalqonsimon bez kasalliklari bo‘lishi mumkin. Lekin saraton ham bundan mustasno emas: ushbu o‘zgarishlar oshqozon osti bezi, yo‘g‘on ichak, oshqozon hamda o‘pka saratonida kuzatilishi mumkin.
9. Jig‘ildon qaynashi
Ushbu alomatlar ko‘pincha ortiqcha ovqatlanish, spirtli ichimliklarni ko‘p ichish, stress yoki uchala sababdan ham kelib chiqadi. Bunday holatda ovqatlanish rejimingizni o‘zgartiring va bir-ikki hafta kuting, shunda ham o‘zgarish ro‘y bermasa, shifokorga murojaat qiling.
Tez-tez kuzatiladigan jig‘ildon qaynashi — oshqozon va tomoq saratoni belgisi. Jig‘ildon qaynashi saraton tufayli kuzatilmayotgan bo‘lsa ham, u qizilo‘ngach shilliq qavatiga zarar yetkazishi va Barret qizilo‘ngachi deb nomlangan kasallikni keltirib chiqarishi mumkin. Unda qizilo‘ngachning normal to‘qimalari saraton oldi to‘qimalari bilan o‘rin almashishi mumkin.
10. Og‘izdagi dog‘lar
Og‘iz bo‘shlig‘ingizda sariq, kulrang, oq yoki qizil dog‘lar bor-yo‘qligiga e’tiborli bo‘ling. Ayniqsa, ko‘p cheksangiz. Bular barchasi og‘iz bo‘shlig‘i saratonini keltirib chiqarishi mumkin. Tekshiruvdan o‘tish uchun tish shifokori yoki terapevtga murojaat qiling.
11. Isitma
Uzoq vaqt tana harorati baland bo‘lsa va bu boshqa kasalliklar bilan bog‘liq bo‘lmasa bu leykemiya yoki gemastozlarning boshqa turi alomatlari bo‘lishi mumkin. Shifokorga borishni kechiktirmang.
12. Charchoq
Charchoq ham kundalik hayotimizda organizm uchun normal holat sanaladi. Lekin bu uzoq davom etsa, e’tiborsiz bo‘lmang. Agar charchoq dam olganingizdan keyin ham davom etaversa, endokrinolog shifokor ko‘rigidan o‘ting.
13. Yo‘tal
Yo‘tal, odatda, 3–4 haftadan keyin o‘tib ketadi. Uzoq davom etayotgan yo‘talga jiddiy sabablar bor bo‘lishi mumkin. Ayniqsa siz nafas olishga qiynalayotgan bo‘lsangiz. Agar yo‘talganda qon aralash yo‘talsangiz, jiddiyroq chora ko‘ring, shifokorga murojaat qiling.
14. Og‘riqlar
Tanadagi tinimsiz og‘riqlar suyak, miya saratonlari belgilari bo‘lishi ham mumkin. Kasallik rivojlangan sari og‘riqlar kuchayadi. Siz sababini bilmagan bunday og‘riq bir oydan ortiq davom etsa, befarq bo‘lmang.
15. Qorin og‘rig‘i va depressiya
Depressiya bilan birgalikda kechayotgan qorin og‘rig‘i oshqozonosti bezi saratoni kasalligi alomati bo‘lishi mumkin. Bu juda kamdan kam hollarda bo‘ladi, darrov vahimaga hojat yo‘q. Agar oilangizda oshqozonosti bezi saratoni irsiy kasallik bo‘lsa, unda tekshiruvdan o‘tishingiz zarur.
Mavzuga doir:
Izoh (0)