Kolumbiya prezidenti Ivan Duke mamlakatda koronavirus pandemiyasi sababli 51 747 kishining vafot etgani munosabati bilan uch kunlik motam e’lon qildi. Bu haqda uning 26-yanvar kungi bayonotiga asoslanib “Izvestiya” nashri xabar berdi.
“Men COVID-19’dan vafot etgan barcha kolumbiyaliklarni va mudofaa vaziri Karlos Olmes Truxilyoni xotirlash to‘g‘risida farmon imzoladim. Uch kun motam qilamiz va ushbu kasallik tufayli bizni tark etganlarning barchasiga hurmat bajo keltiramiz”, — dedi Duke.
Farmon imzolanishidan avvalroq Kolumbiya mudofaa vazirligi rahbari Karlos Olmes Truxilyo 70 yoshida koronavirus tufayli vafot etgani ma’lum qilingandi.
Truxilyo 12-yanvar kuni COVID-19’ga test topshirgan va natija ijobiy chiqqan. U davolanishni boshlagan bo‘lsa-da, asoratlar tufayli sog‘lig‘i yomonlashgan, shifokorlar uni saqlab qololmagan.
Kolumbiyada 26-yanvar holatiga ko‘ra 2,27 million kishi koronavirusga chalingan, shuningdek, 1,80 million bemor infeksiyadan tuzalgan, 51 747 kishi vafot etgan.
Avvalroq Buyuk Britaniya koronavirus oqibatida vafot etganlar soni 100 mingdan oshgan Yevropadagi birinchi davlat bo‘lgani, AQShda koronavirusga chalinganlar soni 24 million kishiga yetgani xabar qilingandi.
Izoh (0)