Dunyo bo‘ylab koronavirusni yuqtirib olganlar soni 100 million kishiga yetdi, deb xabar beradi “RBK” Jons Hopkins universiteti ma’lumotlariga tayanib. Bu Xitoyning Uxan shahrida birinchi marta kasallik avj olganidan keyin bir yildan ziyodroq vaqt o‘tib yuz berdi.
Kasallanganlar soni bo‘yicha birinchi o‘rinda AQSh bormoqda — u yerda virusni yuqtirish bo‘yicha birinchi holat o‘tgan yilning 20-yanvarida qayd etilgan edi. O‘shandan buyon AQShda 25,3 million kishi kasallanib, 423 ming kishi vafot etgan.
Hindistonda 10,6 milliondan ortiq odam virusga chalingan, u yerda ilk kasallanganlar 2020-yil fevralida qayd etilgandi. Undan keyinda Braziliya bormoqda.
Ilk kasallanish holatlari o‘tgan yil 31-yanvarda aniqlangan Rossiyada esa bunday holatlarning soni shu paytgacha 3,7 milliontaga yetgan. Pandemiya boshidan buyon 70 dan ziyod odam vafot etgan.
Shuningdek, Buyuk Britaniya va Fransiyada kasallanganlar soni 3 milliondan oshgan. Ispaniya, Italiya, Turkiya, Germaniya va Kolumbiyada esa COVID-19’ga chalinganlar 2 milliondan ziyodni tashkil etadi.
Uzoq vaqt davomida bemorlar soni bo‘yicha birinchi bo‘lib kelgan Xitoy ayni paytda 83-o‘rinni egalladi. Uxanda vaziyat iziga tushgach, Xitoy hukumati virus tarqalishini to‘xtatishga muvaffaq bo‘lgan edi. Ammo yanvarda vaziyat yomonlashdi: Shitszyachjuan shahrida, shuningdek, Pekin atroflarida o‘nlab odamlar kasallikka chalindi. Bir nechta aholi punktlarida karantin joriy qilindi, minglab odamlarga undan chiqish taqiqlandi.
JSSTning sog‘liqni saqlash sohasidagi favqulodda vaziyatlar bo‘yicha dasturining ijrochi direktori Maykl Rayan koronavirusga qarshi kurashda yaxshi natijalarga erishilganiga qaramay, uni yengish qiyin bo‘lishini bildirdi. U COVID-19 endemik kasallikka aylanishini istisno etmagan — uni butunlay yo‘qotish juda mushkul.
“Insoniyat hozircha faqat qorachechakni yengishga muvaffaq bo‘lgan”, — deydi Rayan. Poliomielit va qizamiq kabi kasalliklarni hozirga qadar butunlay yo‘qotishning imkoni bo‘lmagan. Shu sababli koronavirusni yengish ham oson bo‘lmaydi: chunki COVID-19 dunyoning deyarli barcha mamlakatlarida tarqalib ulgurdi, vaksinadan foydalanishga esa hozircha hammaning ham qurbi yetmaydi. Davlatlar koronavirus oqibatida yuzaga keladigan o‘lim holatini kamaytirish va normal hayot tarziga qaytish imkoniyati bor, biroq vaksinatsiya keng tarqalmasa, COVID-19 bilan kasallanish davom etaveradi.
Ma’lumot uchun, dunyo bo‘ylab virusga chalinganlarning umumiy soni 17-dekabr kuni 74 million, 27-dekabr kuni 80 million, 4-yanvar kuni 85 million, 11-yanvar kuni 90 million, 18-yanvar kuni 95 milliondan oshgandi.
Izoh (0)