АҚШнинг янги мудофаа вазири Ллойд Остин собиқ президент Дональд Трампнинг Афғонистон ва Ироқда қўшинларни камайтириш қароридан кейин у ердаги қўшинлар сонини қайта кўриб чиқиши мумкин, деб ёзади «Коммерсантъ» The Wall Street Journal’га таяниб. Нашр манбаларига кўра, Остин АҚШнинг икки зиддиятдаги стратегик ролини баҳолашни режалаштирмоқда.
Шу билан бирга, Пентагон вакили Жон Кирби маълум қилишича, Афғонистон ва Ироқдаги қўшинлар сонини қайта кўриб чиқиш ҳақида расмий қарор қабул қилинганича йўқ. Унинг таъкидлашича, президент Жо Байденнинг маъмурияти ҳар иккала мамлакатдаги операциялар мақомини яхшилаб тушуниб олишни ва ушбу миссиялар учун фойдаланиладиган ресурсларни баҳолашни истайди.
«Бизнинг Америка халқини терроризм хавфидан ҳимоя қилиш истагимиз борасида ҳеч нарса ўзгаргани йўқ, аммо биз стратегиямизни ресурслар билан тегишлича таъминлаётганимизга ишонч ҳосил қилишимиз керак», — деди Кирби. Унинг сўзларига кўра, қўшинлар сони ҳақидаги қарор Ироқ ва Афғонистон ҳукуматлари билан маслаҳатлашувлардан кейин қабул қилинади.
2020 йил ноябрида АҚШ Афғонистон ва Ироқда 2,5 минг нафардан ҳарбийни қолдиришини маълум қилган эди. Қўшинлар 15 январгача олиб чиқиб кетилди. Афғонистондан 2 минг, Ироқдан 500 киши чиқариб юборилиши айтилган эди. Трампнинг режасига кўра, Ироқ ва Афғонистондан қўшинлар 2021 йил майгача қайтарилиши керак эди.
2021 йил январида эса Афғонистон ва Ироқдаги америкалик ҳарбийлар сони ҳар бир мамлакатда 2,5 минггача камайгани хабар берилди.
Мавзуга доир:
Изоҳ (0)