Mirzaobod tumanida 12 sotix yer maydonini ajratib berishdagi hujjatbozlik ishlari uchun fuqarodan 1200 dollar talab qilgan qurilish bo‘limi boshlig‘i va unga pora olish-berishda vositachilik qilgan sherigi ushlandi. Bu haqda Bosh prokuratura matbuot xizmati “Daryo”ga ma’lum qildi.
Ma’lum qilinishicha, Bosh prokuratura huzuridagi Departament hamda DXXning Sirdaryo tuman bo‘limlari tomonidan tezkor tadbir o‘tkazilgan. Tadbirda Mirzaobod tuman arxitektura bo‘limi sobiq mutaxassisi F.T. ismli fuqaroga 12 sotix yer maydoni ajratish uchun hujjatlarni rasmiylashtirish va uning yordamchi xo‘jaligi binosi loyiha hujjatlarini Sirdaryo tuman qurilish bo‘limi boshlig‘i orqali tayyorlab berish evaziga undan 1200 AQSh dollari talab qilgan. Ushbu shaxs belgilangan mablag‘ning 2,1 million so‘mini qo‘lga kiritib, qolgan 900 dollarni olgan vaqtida ashyoviy dalil bilan ushlangan.
Shuningdek, qo‘lga olingan shaxsning ko‘rsatmalariga asosan davom ettirilgan tadbirda Sirdaryo tuman qurilish bo‘limi boshlig‘i fuqaro F.T.ga 12 sotix yer maydoni ajratish uchun hujjatlarni rasmiylashtirish va uning yordamchi xo‘jaligi binosi loyiha hujjatlarini rasmiylashtirib berish evaziga 400 AQSh dollarini xizmat xonasida pora tariqasida olgan vaqtida ashyoviy dalil bilan ushlangan.
Mazkur holat yuzasidan Jinoyat kodeksining 210, 212-moddalari (pora olish, pora olish-berishda vositachilik qilish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Bo‘stonliqdagi 1 gektar yerni rasmiylashtirib berish uchun 160 ming dollar talab qilgan shaxs qo‘lga olingani, Toshkent viloyatida 60 ming dollarga yer sotmoqchi bo‘lgan tuman hokimi o‘rinbosari ushlangani, Yunusobod tumani hokimining qurilish ishlari bo‘yicha o‘rinbosari 5 ming dollar pora bilan qo‘lga tushgani, shuningdek, Chilonzor tuman hokimligi bo‘lim boshlig‘i 50 ming dollar pora bilan ushlangani to‘g‘risida xabar berilgandi.
Izoh (0)