Toshkent shahridagi 524 ta MFYga ajratiladigan 26,2 mlrd so‘mning qanday tartibda sarflanishi ma’lum qilindi

Xalq deputatlari Toshkent shahar kengashining 19-yanvar kuni bo‘lib o‘tgan 31-sessiyasida Toshkent shahar hokimi Jahongir Ortiqxo‘jayev poytaxtdagi mavjud muammolarni bartaraf etish uchun har bir mahalla fuqarolar yig‘iniga 50 million so‘mdan mablag‘ ajratilishi, namunaviy deb topilgan 50 ta eng yaxshi mahalla raisining har biriga homiylar tomonidan 50 ta Spark avtomobili berilishini ma’lum qilgandi. Bu esa ijtimoiy tarmoqlarda qizg‘in muhokamalarni keltirib chiqardi.

Toshkent shahar hokimligida 21-yanvar kuni o‘tkazilgan Xalq deputatlari Toshkent shahar kengashining 31-sessiyasi natijalari hamda 2021-yil rejalariga bag‘ishlangan matbuot anjumanida MFYlarga ajratiladigan 50 million so‘mning sarflanish tartibi bo‘yicha tushuntirish berildi, deya xabar qilmoqda “Daryo” muxbiri.

Mirzo Ulug‘bek tumanidagi “Katta Qorasuv” MFY raisi, xalq deputatlari Toshkent shahar kengashi deputati Naima Jabborovaning aytishicha, raislar bu mablag‘lar orqali o‘z hududidagi aholining ijtimoiy muammolarini hal qiladi va bu ular uchun yana bir imkoniyat.

“Mahalla raisi podshoh emas, rais jamoat tashkilotining rahbari. Men bir ijrochiman, o‘zimning organim bor, bu mahalla fuqarolari yig‘ini. MFY orasida mahalla fuqarolar yig‘ini kengashi mavjud. ‘Katta Qorasuv’ mahallasida 27 kishidan iborat kengashimiz bor. Barcha masalalarni mana shu kengash a’zolari bilan hal qilamiz. Muhim bir kattaroq masalani hal qilishda kengashdan tashqari, ko‘p qavatli uy hamda ko‘chaboshilar ham o‘z fikrini bildirishga haqli. 2001-yildan beri MFY tizimida faoliyat ko‘rsatayotgan bo‘lsam, biror marta kimdir mahallaga yordam bermagan. To‘g‘ri, idish-tovoq olib berishardi, birorta tadbirni o‘tkazishga ko‘maklashardi. Ammo o‘shanda ham o‘zimiz homiy qidirardik.

Oddiy bir misol, bitta bolaga ‘kolyaska’ olib berish uchun mingta tashkilotga murojaat qilishim kerak. Hujjatlarni topshirib, kutishimiz lozim. Toki mutasaddi tashkilotlardan aravacha kelgunicha bola o‘sib, unga endi kattaroq aravacha kerak bo‘ladi. Bunaqa vaziyatlar juda ko‘p kuzatiladi. Raislar u pulni, ya’ni 50 millionni o‘zining biror ehtiyojiga ishlatadi, deb o‘ylamanglar. Yo‘q, o‘zimizga ishlatmaymiz. Bu faqat mahallada yashayotgan fuqarolarning ijtimoiy ehtiyojlariga sarflanadi. Bu masala muhokama qilinib, MFY kengashining qarori bilan hal etiladi”, — dedi Naima Jabborova.

Uning qo‘shimcha qilishicha, har bir so‘m nazorat qilib boriladi.

“50 million so‘m mening qo‘limga berilmaydi, bu hisob raqamimizga tushadi. Hisob raqamidan bir tiyinni olish uchun qancha hujjatlarni bankka taqdim etish kerak. Bank o‘zidan o‘zi chek yoki boshqa narsaga pul bermaydi. Men to‘g‘ridan to‘g‘ri MFYga bo‘ysunaman, u meni saylaydi va ishdan oladi. Xuddi shunday, yig‘inga bo‘ysunadigan mahalla taftish komissiyasi bor. U har yarim yilda mahallaning amalga oshirilgan moliyaviy faoliyati, o‘zimizning qarorlarni bajarish bo‘yicha taftish o‘tkazadi va muhokamaga olib chiqadi. Ayrim mahalla raislarimiz ham ‘Mana menga hozir 50 million so‘m beradi, xohlagan ishimni qilaman’, deb noto‘g‘ri tushungan bo‘lishi mumkin. Lekin unday emas. Davlatning budjetidan ketayotgan har bir so‘m uchun biz javob beramiz, har bir so‘m hisobda, nazoratda turadi”, — dedi deputat.

Toshkent shahar hokimligi matbuot xizmatining “Daryo”ga ma’lum qilishicha, mavjud muammolarni bartaraf etish uchun poytaxtdagi 524 ta mahalla fuqarolar yig‘inlarining har biriga 50 million so‘mdan, jami 26,2 milliard so‘m ajratiladi.