Korrupsiyaga qarshi kurashish agentligi Coca-Cola kompaniyasini xususiylashtirish bo‘yicha tenderni to‘xtatishni talab qilgani to‘g‘risida xabar berilgandi. Agentlik davlat mulkini sotishda tender savdolarini o‘tkazish bo‘yicha Davlat komissiyasi tomonidan yetarli raqobatga imkoniyat mavjud emasligi sababli mazkur tender jarayonlarini to‘xtatish bo‘yicha taqdimnoma kiritgan. Davlat aktivlarini boshqarish agentligi mazkur taqdimnomaga munosabat bildirdi.
Unda aytilishicha, agentlikning kompaniyaning davlat ulushini sotish jarayoni qanday tashkil etilganligi haqida Davlat aktivlarini boshqarish agentligiga va/yoki Vazirlar Mahkamasining tegishli farmoyishi bilan tuzilgan ishchi guruhga biror-bir murojaati kelib tushmagan.
Taqdimnoma kompaniyani sotish to‘g‘risidagi Davlat aktivlarini boshqarish agentligining 2020-yil 16-dekabrdagi e’lonida joylashtirilgan ma’lumotlar asosida shakllantirilgan.
Davlat aktivlarini boshqarish agentligi Korrupsiyaga qarshi kurashish agentligi hamda jamoatchilik bilan kompaniyadagi davlat ulushini shaffof va oshkora tarzda, xalqaro amaliyot qoidalariga muvofiq holda sotish jarayoni yuzasidan hamkorlik qilishga tayyorligini bildiradi.
Shu bilan birga, yaqin kunlarda mazkur jarayonning bevosita ishtirokchilari bo‘lgan The Coca-cola Export Corporation (AQSh, Atlanta), Rothschild & Co investitsiya banki va Dentons yuridik firmasining taqdimnoma bo‘yicha fikrlari jamlanib, jamoatchilikka tushuntirish beriladi.
“Ushbu orqali yana bir bor jamoatchilikni ishontirib aytamizki, Coca-Cola Ichimligi Uzbekiston Ltd MChJdagi davlat ulushini sotish halol, ochiq va shaffof usullarda hamda dunyodagi o‘zining o‘rniga ega va nomiga putur yetmagan xalqaro kompaniyalar ishtirokida amalga oshirilmoqda”, — deyiladi xabarda.
Eslatib o‘tamiz, Coca-Cola korxonasi O‘zbekistonda 1-raqamli, jahonning 4 ta sifat sertifikatini qo‘lga kiritgan yagona, barqaror ishlab chiqarishga ega zavod hisoblanadi. Birgina 2019-yildagi ishlab chiqarishning bozordagi ulushi qariyb 47 foizni tashkil etgan bo‘lib, bu eng yaqin raqobatchisidan 70 foizga ko‘p.
O‘zbekiston Davlat aktivlarini boshqarish agentligi Coca-Cola Ichimligi Uzbekiston Ltd MChJ ustav kapitalidagi 57,118 foiz ulushini oshkora sotuv jarayoni orqali sotish istagini 2020-yilning dekabr oyida e’lon qilgandi.
Ushbu kompaniya davlat ulushining sotilishi bo‘yicha ko‘rsatgan shartlar orasida sotib oluvchi kamida 7 yillik tajribaga ega bo‘lishi, yillik sof tushumi 200 million dollardan kam bo‘lmasligi, alkogolsiz ichimliklar bo‘yicha xalqaro tajribaga ega bo‘lishi kabilar keltirilgan. Bunday talablar “g‘olib xaridor oldindan aniq”, degan shubhalar paydo qilgan.
Dekabr oyida bosh vazir o‘rinbosari Jamshid Qo‘chqorov Coca-Cola’ning davlat ulushini sotib olish uchun 3 ta taklif tushganini, 70 million dollar berishga tayyor kompaniya bilan muzokara boshlanishini ma’lum qilgandi. Yanvar oyi boshlarida Turkiyaning Coca-Cola İçecek kompaniyasi Coca-Cola’dagi davlat ulushini xarid qilish uchun ariza bergani ma’lum bo‘ldi.
Izoh (0)