Toshkent viloyati Yuqori Chirchiq tumanida 36 yoshli fuqaroga tegishli cho‘chqaxona bostirmasidan umumiy og‘irligi 14 kilogrammga yaqin marixuana giyohvandlik vositasi topildi, deb xabar beradi Tergov departamenti.
Ma’lum qilinishicha, 21-yanvar kuni soat 11:30 da Yuqori Chirchiq tumani IIB xodimlari tomonidan o‘tkazilgan tezkor tadbir davomida 36 yoshli D.K.ning “T.G.Xvan” mahallasida joylashgan yashash xonadoni ko‘zdan kechirilgan. Tekshiruv vaqtida uydagi cho‘chqaxonaning bostirma qismidan 1 dona 100 litr va 1 dona 60 litr hajmdagi yelim idishlarda yashil rangli, o‘tkir hidli, ko‘rinishidan nasha giyohvandlik moddasi o‘simligiga o‘xshash bo‘lgan quritilgan holdagi o‘simlik tuplari borligi aniqlangan.
Shuningdek, shu yerdagi o‘choqda osilgan qozonda nashaga o‘xshash bo‘lgan o‘simlikni qovurilgan holatda saqlab kelayotganligi aniqlanib, xolislar ishtirokida ashyoviy dalil tariqasida rasmiylashtirib olingan.
Sud kimyoviy ekspertizasi xulosasida D.K.ning uyidan olingan modda tarkibida faol giyohvand modda — tetragidrokannabinol mavjud bo‘lgan marixuana giyohvandlik vositasi ekanligi va ularning umumiy og‘irligi 13 899 grammni tashkil qilishi hamda qozondan olingan yog‘da qovurilgan marixuana giyohvandlik vositasining og‘irligi 270,14 gramm ekanligi ko‘rsatilgan.
Holat yuzasidan Yuqori Chirchiq tumani IIB huzuridagi tergov bo‘limi tomonidan D.K.ga nisbatan Jinoyat kodeksining 276-moddasi 2-qismi “a” bandi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) bilan jinoyat ishi qo‘zg‘atilgan.
Dastlabki tergov jarayonida D.K.ga nisbatan Jinoyat kodeksining 25, 273-moddasi 5-qismi (ko‘p miqdordagi giyohvandlik vositalarini sotishga suiqasd qilish) bilan ayblov e’lon qilingan hamda qamoqqa olish tarzidagi ehtiyot chorasi qo‘llanilgan.
Hozirda tergov harakatlari olib borilmoqda.
Avvalroq Buxoroda farzandining yotoqxonasida giyohvand modda saqlab kelgan ota qo‘lga olingani, Samarqandda deyarli 600 dollarga giyohvand modda sotgan ikki yigit ushlangani, shuningdek, Andijonda giyohvand modda sotgan 4 kishi qo‘lga olingani to‘g‘risida xabar berilgandi.
Izoh (0)