Тошкент шаҳридаги 524 та МФЙга ажратиладиган 26,2 млрд сўмнинг қандай тартибда сарфланиши маълум қилинди

Халқ депутатлари Тошкент шаҳар кенгашининг 19 январь куни бўлиб ўтган 31-сессиясида Тошкент шаҳар ҳокими Жаҳонгир Ортиқхўжаев пойтахтдаги мавжуд муаммоларни бартараф этиш учун ҳар бир маҳалла фуқаролар йиғинига 50 миллион сўмдан маблағ ажратилиши, намунавий деб топилган 50 та энг яхши маҳалла раисининг ҳар бирига ҳомийлар томонидан 50 та Spark автомобили берилишини маълум қилганди. Бу эса ижтимоий тармоқларда қизғин муҳокамаларни келтириб чиқарди.

Тошкент шаҳар ҳокимлигида 21 январь куни ўтказилган Халқ депутатлари Тошкент шаҳар кенгашининг 31-сессияси натижалари ҳамда 2021 йил режаларига бағишланган матбуот анжуманида МФЙларга ажратиладиган 50 миллион сўмнинг сарфланиш тартиби бўйича тушунтириш берилди, дея хабар қилмоқда «Дарё» мухбири.

Мирзо Улуғбек туманидаги «Катта Қорасув» МФЙ раиси, халқ депутатлари Тошкент шаҳар кенгаши депутати Наима Жабборованинг айтишича, раислар бу маблағлар орқали ўз ҳудудидаги аҳолининг ижтимоий муаммоларини ҳал қилади ва бу улар учун яна бир имконият.

«Маҳалла раиси подшоҳ эмас, раис жамоат ташкилотининг раҳбари. Мен бир ижрочиман, ўзимнинг органим бор, бу маҳалла фуқаролари йиғини. МФЙ орасида маҳалла фуқаролар йиғини кенгаши мавжуд. ‘Катта Қорасув’ маҳалласида 27 кишидан иборат кенгашимиз бор. Барча масалаларни мана шу кенгаш аъзолари билан ҳал қиламиз. Муҳим бир каттароқ масалани ҳал қилишда кенгашдан ташқари, кўп қаватли уй ҳамда кўчабошилар ҳам ўз фикрини билдиришга ҳақли. 2001 йилдан бери МФЙ тизимида фаолият кўрсатаётган бўлсам, бирор марта кимдир маҳаллага ёрдам бермаган. Тўғри, идиш-товоқ олиб беришарди, бирорта тадбирни ўтказишга кўмаклашарди. Аммо ўшанда ҳам ўзимиз ҳомий қидирардик.

Оддий бир мисол, битта болага ‘коляска’ олиб бериш учун мингта ташкилотга мурожаат қилишим керак. Ҳужжатларни топшириб, кутишимиз лозим. Токи мутасадди ташкилотлардан аравача келгунича бола ўсиб, унга энди каттароқ аравача керак бўлади. Бунақа вазиятлар жуда кўп кузатилади. Раислар у пулни, яъни 50 миллионни ўзининг бирор эҳтиёжига ишлатади, деб ўйламанглар. Йўқ, ўзимизга ишлатмаймиз. Бу фақат маҳаллада яшаётган фуқароларнинг ижтимоий эҳтиёжларига сарфланади. Бу масала муҳокама қилиниб, МФЙ кенгашининг қарори билан ҳал этилади», — деди Наима Жабборова.

Унинг қўшимча қилишича, ҳар бир сўм назорат қилиб борилади.

«50 миллион сўм менинг қўлимга берилмайди, бу ҳисоб рақамимизга тушади. Ҳисоб рақамидан бир тийинни олиш учун қанча ҳужжатларни банкка тақдим этиш керак. Банк ўзидан ўзи чек ёки бошқа нарсага пул бермайди. Мен тўғридан-тўғри МФЙга бўйсунаман, у мени сайлайди ва ишдан олади. Худди шундай, йиғинга бўйсунадиган маҳалла тафтиш комиссияси бор. У ҳар ярим йилда маҳалланинг амалга оширилган молиявий фаолияти, ўзимизнинг қарорларни бажариш бўйича тафтиш ўтказади ва муҳокамага олиб чиқади. Айрим маҳалла раисларимиз ҳам ‘Мана менга ҳозир 50 миллион сўм беради, хоҳлаган ишимни қиламан’, деб нотўғри тушунган бўлиши мумкин. Лекин ундай эмас. Давлатнинг бюджетидан кетаётган ҳар бир сўм учун биз жавоб берамиз, ҳар бир сўм ҳисобда, назоратда туради», — деди депутат.

Тошкент шаҳар ҳокимлиги матбуот хизматининг «Дарё»га маълум қилишича, мавжуд муаммоларни бартараф этиш учун пойтахтдаги 524 та маҳалла фуқаролар йиғинларининг ҳар бирига 50 миллион сўмдан, жами 26,2 миллиард сўм ажратилади.