O‘zbekiston Prezidenti 2021-yil 21–22-yanvar kunlari Buxoro viloyatiga qilgan tashrifi davomida Olotga yo‘lovchi poyezdlar qatnovini yo‘lga qo‘yish bo‘yicha taklif bergan edi. “O‘zbekiston temir yo‘llari” tomonidan 2021-yil 25-yanvardan boshlab Toshkent—Olot—Toshkent yo‘nalishida haftasiga 4 marotaba yo‘lovchi poyezdlari qatnovi yo‘lga qo‘yildi. Bu haqda kompaniya axborot xizmati xabar qildi.
Unga ko‘ra haftaning dushanba, seshanba, payshanba hamda juma kunlari Toshkent—Olot yo‘nalishida, 26-yanvardan boshlab esa haftaning seshanba, chorshanba, juma va shanba kunlari Olot—Toshkent yo‘nalishida yo‘lovchi poyezdlar qatnovi boshlanadi.
Qo‘shimcha ma’lumotlarni Toshkent shahrida 1005 qisqa telefon raqami, joylardagi temiryo‘l kassalari hamda ma’lumotlar byurosidan bilib olish mumkin.
Avvalroq O‘zbekistonda 2021-yilda avia va temiryo‘l chiptalariga 30 foiz chegirma berilishi, “O‘zbekiston temir yo‘llari” 63,4 mlrd so‘m zarar ko‘rgani hamda “Afrosiyob” poyezdining reyslari soni bittaga ko‘paygani haqida xabar berilgandi.
Izoh (0)